CEBU, Philippines - Ang Paknaan National High School misikad sa ilang kampanya pinaagi sa pagdemolis sa Canduman National High School, 37-14 sa 18th Mandaue City Amateur Basketball Association (MACABA) season nga giulohan og ‘Ating Guro Cup’ didto sa Mandaue City Cultural and Sports Complex.
Upat lamang ka teams ang mipakita’g aksiyon sa girls division nga giapil sa labing unang higayon sa maong tinuig nga torneyo nga gimugna ni Aurelio Eslawan Jr.
Ang mga babayeng basketbolista sa Paknaan naglaraw sa ikaduha nilang sunod-sunod nga daog sa ilang pag-host sa Mandaue City Comprehensive NHS karong Domingo sa alas- 11 sa buntag.
Sa boys 17-under, ang Mt. Olives-A mikulit og 59-46 nga demolisyon batok sa Garing NHS sa bracket A.
Ang Mt. Olives nakigsawo na karon sa liderato sa University of the Visayas-Mandaue, kinsa mipaluhod sa St. Paul CFI-Ramos, 55-19.
Sa bracket B, ang Tingub ug Don Gerardo Ouano Llamera Memorial NHS midaog sab sa una nilang duwa. Ang Tingub nakaipsot batok sa MCCNHS, 56-54, samtang ang DGLOMNHS nanginahanglan una og overtime sa wala pa miposte og kulbahinam nga daog batok sa University of Cebu (UC) Lapu-Lapu/Mandaue, 61-57. (BANAT PALARO)