CEBU, Philippines - Midaog pinaagi sa overtime ang Barako Bull Energy batok sa Talk ‘N Text Tropang Texters, 105-98 sa PBA Philippine Cup kagabii didto sa Smart Araneta Coliseum.
Gipakgang sa Barako ang damgo sa Talk ‘N Text (4-3) nga moabante sa top four sa naghinapos nga elimination round.
Ang Barako misaka usab sa ikalimang dapit sa standing bitbit ang 4-4 baraha diin ilang gikatabla ang Barangay Ginebra San Miguel ug NLEX Road Warriors.
Ang veteran forward sa Barako Bull nga si Willy Wilson mihimo og impresibong performance human siya mirehistro og double-double nga 28 puntos ug 19 ka rebounds.
Si RR Garcia miiskor og 22 puntos, samtang si Gilas Pilipinas cager JC Intal mitampo og 12 puntos.
Sikit ang duwa gikan sa pagsugod hangtod sa final period ug ang Texters nakabaton og kahigayonan nga makuha ang daog, apan mikagar ang game-winning three-pointer ni Jayson Castro sa himalatyong segundo nga miresulta sa overtime, 97-all.
Sa overtime, gilupig sa Energy ang Texters sa diskarte sa pagpangulo nila ni Intal ug Wilson. (BANAT PALARO)