CEBU, Philippines – Krusyal nga three-pointer ni team owner Israel Alin ug ang mga uwahing baskets nilang Ryan Villomo ug Julius Tarona maoy nagtuboy sa Alin Customs Brokerage ngadto sa 65-61 nga kadaogan batok sa Alburo Brokers kaniadtong Miyerkules sa gabii aron magpabiling buhi sa ilang tinguha nga moabante ngadto sa semifinals sa nagpadayon nga BOC Friendship Cup Christmas League basketball tournament didto sa San Roque gym, ning dakbayan.
Ang bugtong puntos ni Alin nga usa ka three-pointer, maoy labing krusyal sa maong duwa tungod kay siya maoy naghatag og labaw sa iyang team sa wala pa sila hingpit molampos pagkulit og kuwatro puntos nga kadaogan.
Silang Villomo ug Julius Tarona parehong miposa og 12 puntos alang sa 4-2 nga Alin Brokers kinsa makigsangka batok sa Duke-SRBC karong gabii sa kataposan nilang duwa sa elimination round.
Duha pa lang ka teams ang nakaangkon og luna sa semifinals nga mao ang 6-0 nga CEI Brokers ni Wiljun "Sugar" Camay ug ang 5-1 nga MP Brokers ni Marty Pimentel.
Laing single round robin ang mahitabo sa semifinals diin magbagat ang no. 1 batok sa no. 4 ug magsangka ang no. 2 vs. no. 3 diin ang modaug tali kanila maoy moabante sa knockout finals.
Puntos matag usa:
Alin Brokers (65) — Tarona 12, Villomo 12, Barral 6, Sanguenza 6, Cayanong 5, Perolino 4, Filoteo 4, Baltonado 4, Alin 3, Lleve 2, Palero 1.
Alburo Brokers (61) — Marata 15, Labares 14, Minoza 12, Baguio 10, Canales 4, Bacor 1. (BANAT NEWS)