CEBU, Philippines - Pagkulit sa ikaduhang sunod-sunod nga daog maoy tuyo sa Alaska Aces dihang ilang sangkaon ang Blackwater Elite sa PBA Philippine Cup karong adlawa didto sa Smart Araneta Coliseum.
Ang duwa sugdan sa alas-4:15 sa hapon ug ang kadaugan sa Alaska motukmod kanila sa unang dapit sa standing uban sa San Miguel Beermen, NLEX Road Warrior ug Rain or Shine Elasto Painters nga pulos adunay 2-0 records.
Human sa ilang impresibong kadaugan sa opening game batok sa Talk ‘N Text Tropang Texters, 114-98, ang Alaska gipaabot nga modispatsar sa huyang nga Blackwater.
Sama sa gihapon, ang Alaska magsalig sa ilang mga Gilas Pilipinas cagers nga sila si Calvin Abueva ug Sonny Thoss, uban nilang JV Casio, Tony Dela Cruz ug Cyrus Baguio.
Sa main game nga gitakda sa alas-7 sa gabii, ang Star Hotshots tinguha usab nga mokulit sa ikaduha nilang daog sa ilang pakigbatok sa GlobalPort Batang Pier. (BANAT PALARO)