CEBU, Philippines – Gipatilaw sa Star Hotshots og pilde ang kanhi nila coach nga si Tim Cone dihang ilang gipukan ang Barangay Ginebra San Miguel, 86-78, sa PBA Philippine Cup kagabii didto sa Smart Araneta Coliseum.
Sa usa sa mga giatangang duwa karon nga season, ang Star ni coach Jason Webb mipakita nga mapilde nila ang Ginebra bisan pa og atoa na ang ilang multi-titled coach nga si Cone.
Dili lang daog apan usa ka dominanteng kadaugan ang gibuhat sa Star nga milubong sa Ginebra sa kinatibuk-an sa duwa sa wala pa mihimo og katapusang hunat ang nauwahi aron manaog ang labaw ngadto sa single digit paingun sa katapusan sa duwa.
Wa musalir kagabii ang 'triangle offense' ni Cone dihang gigamitan sila og hugot nga depensa sa mga players Star nga miresulta sa 55-32 nga labaw sa sayung bahin sa third period.
Si James Yap maoy nangulo sa Star sa iyang 19 puntos, samtang sila si PJ Simon ug Mark Barroca kinsa mga kanhi sinaligan ni Cone mitampo og 12 puntos matag usa.
Ang Cebuano center nga si Greg Slaughter mirehistro og 28 puntos ug 16 ka rebounds, apan di kini igo aron tabangan ang Ginebra nga makuha ang labing una nilang daog sa season.
Sa sayu pa, midaog usab ang Rain or Shine Elasto Painters nga misaka sa ilang record ngadto sa 2-0 human nila gilatos ang Mahindra Enforcers, 108-94, ni Manny Pacquiao kinsa mihimo sa labing una niyang field goal sa PBA human ang usa ka long jumper. (BANAT NEWS)