CEBU, Philippines – Pulos nakakuha og luna sa finals ang men’s ug women’s team sa Southwestern University sa Cebu Schools Athletics Foundation, Inc. (CESAFI) volleyball event sa miaging adlaw didto sa University of Southern Philippines Foundation gym.
Bisan pa’g napilde sila sa katapusan nilang duwa sa semifinals batok sa University of San Jose-Recoletos, 28-26, 22-25, 25-11, 25-21,ang Lady Cobras misulod gihapon sa finals human mikolekta og sayes puntos. Ang USJ-R maoy No. 1 sa ilang siyete puntos, samtang ang University of San Carlos (USC) pakyas pagsulod sa championship round human sila matagak sa ikatulo sa ilang kuwatro puntos.
Wala kalusot ang USC bisan pa og midaog sila sa host USPF, 16-25, 25-20, 25-16, 22-25, 15-13.
Sa ilang bahin, ang SWU men’s squad nimartsa sa finals human nila gilatos ang USJ-R , 25-23, 18-25, 25-20, 25-22. Ang SWU makigsangka sa USC sa usa ka “best-of-three” finals series.
Sa secondary division, ang SWU girls milusot usab sa finals diin makigsangka sila sa Sacred Heart School-Ateneo de Cebu, samtang ang USJ-R moduwa batok USC alang sa boy’s title.
Ang championship round sugdan sa Oktubre 17 diha sa USC main. (BANAT NEWS)