CEBU, Philippines - Ang defending champion nga si Noel Tillor maoy mangu sa liboan ka mga runners sa Cebu leg sa National Milo Marathon nga mosikad ugmang adlawa diha sa Cebu City Sports Center.
Si Tillor maoy nidaog sa regional title ug mipahiluna ikalima sa overall sa miaging edisyon sa Milo Marathon, ang labing karaan nga running event sa tibuok nasud.
Daku’g kahigayonan nga madepensahan ni Tillor ang iyang titulo dihang ang kanhi regional titlist nga si John Philip Duenas gitakdang moatras tungod sa injury.
Matud pa ni Tillor, nga andam siya sa hagit ni bisan kinsa ang mangahas pagbabag sa iyang dalan sa kalampusan.
“Mas malipay pa gani ko kun mas daghan pang kusgan ang modayo diri. Sukol man gani ta’g Kenyan. Diha man gud nato masukod atong kusog ug kun unsa pa’y dapat natong buhaton. Pero basta ready nako,” matud ni Tillor.
Si Tillor naila tungod sa iyang pagpilde sa mga Kenyan runners sa makadaghang higayon. (BANAT NEWS)