CEBU, Philippines – Gisilhig sa RDAK Transporters ug sa Dynamic Power ang ilang mga kaatbang aron moabante sa Division B finals sa 20th SHAABAA Cup basketball tournament niadtong Domingo didto sa SHS-AdC Canduman Campus sa dakbayan sa Mandaue.
Ang Transporters midaog batok sa Autolab, 54-50 aron masakmit ang unang luna sa finals, samtang gilubong sa Dynamic Power ang Caltex Delo, 80-51 alang sa nahabiling luna.
Ang best-of-three final series sugdan karong gabii.
Si John Paul Cabrera miposa’g 19 puntos aron pangulohan ang Transporters, samtang ang Autolab gipangulohan ni Merrick Goho sa iyang 22 puntos.
Sa laing bahin, ang Dynamic Power gipangulohan ni Theogene Lim, kinsa mibahog og 15 puntos, gisundan nilang Walter Ong ug Conrad Ang nga pulos adunay 14 puntos.
Si Dennis Que maoy nangu sa Caltex Delo sa iyang 13 puntos.
Sa mga duwa sa Division A, ang RDAK Stallions midemolis sa Gaisano Capital, 87-63 aron moabante sa ikaduhang puwesto, ang Cebu Landmasters milubong sab sa Chick@Phil Basic,109-39 ug gilubong sab sa Petron Goldberry ang Filmon Prince Medallion, 58-36. (BANAT NEWS)