CEBU, Philippines - Ang Lexmark Stallions migamit sa balanse nilang opensiba aron pagpakgang sa SSI Warriors, 73-59, alang sa ikaunom nilang sunod-sunod nga daog sa 11th CSCC E-League men’s basketball tournament niadtong Domingo sa City Sports Club-Cebu gym.
Si Sylvester Millevo mitapos og 17 puntos alang sa Stallions, kinsa mipabarag sa Warriors human miposte’g 12 puntos nga bentaha, 21-9 human sa unang kuwarter. Bisan pa man sa pagpabuto ni Lawrence Daven Agas og 34 puntos, wala na makabangon pa ang Warriors, kinsa nakatilaw sa ikaupat niining pilde sa unom ka duwa.
Sa laing duwa ubos sa Elite Classic, si Marcos Genteli Jungoy III miratsada’g 16 puntos aron pagpangu sa 74-63 nga kadaugan sa Teleperformance All-Stars batok sa Sykes Pioneers.
Si Ryan Veloso miamot og 13 puntos, samtang sila si Cecilio Sam Jr. ug James Lester Nevaja mikimada og 10 puntos matag usa alang sa All-Stars nga nagbitbit og 6-1 nga baraha.
Sa Evo League, si Donald Stephen de Leon miposa’g 16 puntos uban ang 17 ka rebounds aron pag-agak sa Author Solutions, Inc. Hardbacks ngadto sa 71-67 nga daog batok sa Contact Solutions, samtang si Aerl Genebraldo mipatuasik og 28 puntos alang sa Calltek Trojans pagpatikangkang sa Teletech Titans, 74-66.
Ang Hardbacks nagtangag na karon og 3-3 nga baraha, samtang ang Calltek adunay 3-4 record. (BANAT NEWS)