Fusion kampiyon sa A+EBA caging

CEBU, Philippines – Gitiwasan og kulata sa Team Fusion ang Stay Clean, 82-63 sa Game 2 sa ilang best-of-three finals aron pagsakmit sa labing unang kampiyonato sa Architects+Engineers Basketball Association’s Davies Paints Cup niadtong Domingo didto sa Cebu Eastern College gym.

Si Ed Macasling miratsada og 26 puntos uban ang upat ka rebounds ug upat sab ka steals, samtang ang ilang import nga si Jonas Panerio milansang og tulo ka 3-pointers sa iyang 16 puntos uban ang lima ka rebounds alang sa Fusion nga hapsay kaayong naglawig ngadto sa kadaugan human nakalabaw og nuybe puntos, 22-12 sa sayong bahin sa duwa.

Ang Fusion, nga gitimon sa mga lisensiyadong Mechanical Engineers, nakasustinir sa ilang kainit dayon na ngadto sa paglubong sa Stay Clean og 19 puntos.

Si Paul Besinga miratsada og 21 puntos, tulo ka assists, duha ka rebounds ug duha ka steals, samtang si Michael Vincent Cinco mitali og 17 puntos uban ang lima ka rebounds, duha ka assists ug duha ka steals apan ang ilang paningkamot nakawang sa habig sa Stay Clean. (BANAT NEWS)