CEBU, Philippines - Gipilde sa RDAK Stallions ang Filmon Prince Medallion, 63-53 aron moabante sa ikaduhang puwesto sa Division A sa 20th SHAABAA Cup basketball tournament niadtong Miyerkules didto sa SHS-AdC old campus gym sa Gen. Maxilom Avenue, ning dakbayan.
Si Flatcher Galvez maoy nangu sa RDAK Stallions sa iyang 15 puntos, gisundan ni Lucky Ecarma nga adunay12 puntos.
Ang Filmon gipangulohan ni Jonathan Cimafanca, kinsa miposa’g 25 puntos.
Midaog sab ang ilang igsuong koponan nga Transporters pinaagi sa paglubong sa Autolab, 52-39 sa Division B.
Si John Paul Cabrera maoy nangu sa Transporters nga adunay 12 puntos, samtang si Rhett Tomakin miamot og 11 puntos. Ang Autolab gipangulohan ni Francis Singko kinsa mihimo lang og otso puntos.
Sa laing duwa, si Roderick Mangubat miiskor og 14 puntos aron pangulohan ang Dynamic Power nga milubong sa Caltex Delo, 55-34.
Mikulit sa labing una nilang daog ang Filmon Finishing Studio pinaagi sa pagpilde sa White Gold Club, 51-49, samtang nakaipsot sab ang Gaisano Capital batok sa Cebu Landmasters, 50-49.
Ang Filmon gipangulohan nilang Roderick Garcia ug Erickson Atienza nga adunay 13 ug 11 puntos matag usa, samtang ang White Gold gipangulohan sab ni Romero Alejandro pinaagi sa iyang 25 puntos. (BANAT NEWS)