CEBU, Philippines – Ang Team Samsam Gullas mipakgang sa Abrenica Engineering, 94-86, sa kulbahinam nilang final match aron pagsakmit sa kampiyonato sa 8th Emil’s Fresh Chicken Fiesta Cup open basketball tournament ning bag-ohay lang didto sa Lipata Sports Complex sa Barangay Linao, Minglanilla, Cebu.
Si Ferdinand Lusdoc mipatuasik og 30 puntos aron paglabni sa MVP award, apan si Eliud Poligrates, nga beterano uban sa upat ka PBA teams, maoy mipasud sa mga mahinungdanong itsa nga maoy nakapabuhi og balik sa dugo sa Samsam Gullas team taliwala sa mainit nga rally sa Abrenica Engineering sa hinapos nga bahin sa duwa. Gumikan sa pagpanginit ni Lusdoc, ang Team Samsam Gullas nagmangtas sa sayong bahin dayon na ngadto sa pagkulit og 22 puntos nga labaw, 68-46, sa nahibiling tres minutos sa third quarter.
Apan sa kalit lang milusad og nagbagang opensa ang Abrenica Engineering pinaagi nilang John Villaver, Landry Sanjo ug Wowie Escosio aron pagpaduol niini ngadto na lang sa singko puntos nga alkansi, 81-86 sud sa dos minutos nga nahibilin.
Niadto nang puntoha nga si Poligrates misalida og maayo pinaagi sa pagtusak og duha ka sunod-sunod nga tres nga nakapaginhawa og lawom sa koponan ni Samsam Gullas.
Si Poligrates mitapos og 12 puntos, samtang si Reed Friar Juntilla miamot og 13 puntos alang sa Team Samsam Gullas ni coach Van Halen Parmis, nga mipalig-on og samot sa iyang estado isip usa sa mga winningest commercial coaches sa Vis-Min region bitbit ang ika-41 niyang titulo sa mga torneyo nga iyang gisalmotan sud sa walo ka tuig.
Human gipakyaw og daog ang unom nila ka duwa, si team owner ug Cebu First District Rep. Gerald Anthony ‘Samsam’ Gullas, Jr. maoy nangunay pagdawat sa ilang tropeyo ug sa P110,000 nga ganti. Ang Abrenica Engineering mibulsa og P50,000. (BANAT NEWS)