Masaksihan na sab sa mga Sugboanong mahiligon sa basketball ang lain na sab nga edition sa Cebu Schools Athletic Foundation, Inc. (CESAFI) nga naa na sa ilang ika-15 nga season ug buksan kini unya sa Agosto 1 diha sa Cebu Coliseum.
Haum gyud unya kaayo ang ika-15 nga season kay ang tanang teams---collegiate ug high school, pagalangkuban og 15 ka players sa ilang official line-up.
Apan karon nga season, sa pito ka collegiate teams, tulo lang ang adunay 15 ka players, ang uban adunay 14, aduna sa'y 13 ug ang labing diyutay siyam lang gyud ka players.
Ang mga huyang mga collegiate teams sama sa University of Cebu, Cebu Institute of Technology ug University of Southern Philippines-Foundation adunay 15 ka players nga pulos gyud mipasar sa screening busa silang tanan kwalipikadong moduwa.
Ang University of the Visayas ug ang University of San Carlos adunay 14 ka players, ang University of San Jose Recoletos adunay 13 apan ang defending champion Southwestern University aduna la'y siyam ka players ug wala pa gyu'y import. Maayo na lang kay mibalhin gikan sa UC si John Auditor aron mahimo silang siyam.
Nahitabo na sad kini dili pa lang dugay diin napugos pagduwa ang USC nga may walo ngadto sa siyam lang ka players tungod kay ang uban wala mopasar sa screening ug ang uban nahiagom og injury.
Ang usa ka collegiate player kwalipikadong moduwa sa CESAFI kung mopasar siya'g 60 percent sa iyang gi-enroll nga 15 ka units ug wala labot sa maong units ang Physical Education ug ang Reserve Officers Training Course kon ROTC.
Tungod kay wala kini mahimo sa uban nga tunghaan, wala sad aprubahi sa screening committee ang gisumitir nga mga ngan sa mga players.
Niadtong miaging tuig, mitugot ang CESAFI nga ilisdan ang ilang import nga si Justin Aboude Sanjo tungod sa "humanitarian reason" kinsa gikatahong may problema sa kasing-kasing.
Karong tuiga, daw sa dili na gyud mahilot nga susteneran na lang sa Cobras ang ilang Lucky Nine fighters kay milapas na man ang deadline sa pagsumitir sa official line-up niadto pang miaging semana.
Matud pa sa ubang mga teams diin naka-comply sa requirements nga angayan gyu'ng respetohan ang lagda o balaud sa CESAFI kay kung dili kini tahuron, mas maayo pang dili na lang gyud magbutang og rules o guidelines.
Gani medyo nakuwestiyon ang desisyon ni CESAFI commissioner Felix O. Tiukinhoy, Jr. kay kung ugaling humanitarian ang basehan, ang angayan unta kaloy-an kadtong mga teams nga wala'y import sama sa UC, CIT ug USPF.
Bulahan ang ubang teams kay adunay mga assistant coaches o di ba hinoon mga sakop sa coaching staff nga maoy mangunay sa pag-asikaso kalabot sa grado sa ilang players ug kung mabuhat kini sa uban samtang layo pa ang CESAFI, nganong dili man kini buhaton sa ubang mga coaches aron inig-abot sa deadine, tukma nga 15 gyud ka players ang makaduwa ug sa samang paagi, 15 sab ka mga players ang makapahimus sa scholarship.
Sa gipadala pinaagi sa email nga official line-up, hasta sab diay mga teams sa high school ang dili kumpleto apan dili kini gumikan sa grado apan nakabsan sila sa playing years.
Ang defending champion Sacred Heart School-Ateneo de Cebu Magis Eagles aduna la'y 13 ka players ug sila maoy labing diyutay og players sa walo ka high school teams.
Dunay 15 ka players ang UV, UC, CIT, CEC ug DBTC ug dunay 14 ka players ang USJR.
MISCELLANEOUS. Congratulations to the University of San Carlos Warriors for winning the Bogo City Mayor's Cup CESAFI Pre-Season basketball tournament crown last Saturday.