CEBU, Philippines – Ang kanhi five-division world champion nga si Nonito ‘The Filipino Flash’ Donaire Jr. (33-2, 21KOs) sugod na og hawan sa iyang dalan paingon sa laing world title shot dihang iyang harungon si Brazilian William Prado (22-4, 15KOs) alang sa bakanteng NABF super bantamweight title sa iyang comeback fight sa Marso 28 didto sa SM Mall of Asia Arena.
Si Donaire maoy supporting bout sa sangka ni ALA Gym champion Donnie ‘Ahas’ Nietes, kinsa manalipod sa iyang WBO light flyweight title batok ni Mexican Luis ‘Gallo’ Ceja sa main event sa Pinoy Pride 30.
“After a long search, it is official, Nonito will fight Prado,” matud pa ni ALA Promotions President and CEO Michael Aldeguer. “He (Prado) is a strong boxer and we believe he can give Donaire a good challenge.”
Ang Fil-American boxer nga si Donaire, 32-anyos, gusto nga makuha pagbalik sa dungog human mailog ang iyang WBA featherweight belt pinaagi sa sixth round KO batok ni Jamaican Nicholas Walters upat na ka buwan ang milabay didto sa California.
“This will show if he (Donaire) has already recovered from that knockout loss,” matud pa ni Aldeguer. “Nonito now has a great chance in building his confidence back.”
Miingon usab si Aldeguer nga sa labing unang away niya sa nasud, si Donaire mopahigayon sa tibuok niyang training camp sa nabantog nga ALA Gym uban sa iyang amahan ug veteran Pinoy trainer nga si Nonito Sr. (BANAT NEWS)