CEBU, Philippines – Usa ka bangis nga second round KO nga kadaugan ang gibuhat ni kanhi IBF light flyweight champion Johnriel ‘Cuadro Alas’ Casimero (21-2, 13KOs) aron mapilde si Mexican Armando ‘Cobra’ Santos (14-4, 8KOs) sa ilang IBF flyweight title eliminator kagahapon didto sa Salon Las Palmas sa Monterey, Mexico.
Sa maong kadaugan, nakuha ni Casimero ang katungod nga mahimong mandatory challenger alang sa IBF 112 pound title nga kasamtangang gihuptan ni undefeated Thai Amnat Ruenrong.
Sa taho sa boxingscene.com, si Casimero wala mag-usik og panahon ug daling mipauwan og kinumo sa ulo ug lawas sa Mehikano kinsa natumba sa hinapos nga minuto sa opening round.
Human makita nga wala pa kaayo makarekober iyang kontra human sa iyang kulata, si Casimero nagdali nga miatake aron hingpit nga paundangon si Santos sa 25 segundos sa ikaduhang round.
"Gusto ko og nindot nga daog pero wa ko mag-expect nga sayo ra nako siya ma-KO," matud pa sa garbo sa Ormoc City. "Salamat sa tanan nga misuporta nako og maningkamot nga mahimo gyud ko nga world champion pagbalik."
Ang 25-anyos nga si Casimero nawagtangan sa iyang IBF light flyweight title niadtong Mayo 2 dihang wala siya kakuha sa 108 lbs. limit. Midaog hinuon siya batok unta sa iyang challenger nga si Colombian Mauricio Fuentes kinsa iyang gipakatug sa first round didto sa Waterfront Cebu-City Hotel and Casino. (BANAT NEWS)