CEBU, Philippines – Grabeng nagmaya ang tanang sakop sa PBA community human sa kadaugan ni Kia Sorento head coach Manny Pacquiao batok ni Chris Algieri kagahapon didto sa Macau.
Si PBA Commissioner Chito Salud mapasigarbohon tungod kay dakung dungog ang nahatag sa bag-ong sakop sa pamilya sa PBA nga si Pacquiao sa nasud.
“As his colleagues in the PBA, as his fans, as his countrymen, we cannot be happier,” matud pa ni Salud sa The Philippine STAR.
Gawas pa niini, wala'y angul si Pacquiao human sa away nga nagpasabot nga makaduwa dayun kini pagbalik uban sa Kia inig balik niini sa nasud.
“Manny is victorious. Manny is safe. There is nothing more we can ask for. We can’t wait for him to come home to our country and to the PBA,” dugang pa niya.
Sa wala pa siya milarga didto sa Macau, si Pacquiao misaad nang daan nga moduwa uban sa iyang koponan sa Miyerkules batok sa Purefoods didto sa Ynares Sports Center sa Antipolo.
Si Pacquiao katapusang miduwa uban sa Kia niadtong Oktubre 19 diin nakuha sa Kia ang una ug nag-inusara nilang daog.
Sa laing bahin, ang Talk ‘N Text Tropang Texters midaog usab batok sa Barako Bull Energy, 122-106, kagahapon didto sa Alonte Sports Arena sa Laguna. (BANAT NEWS)