CEBU, Philippines - Kasado na ang tanan alang sa fifth leg sa MS Motosuit Motocross Series nga uloha’g 2014 Calambua Motocross Challenge nga gikatakda sa Oktubre 5 didto sa Calambua race course sa San Remigio sa amihanang lungsod sa Sugbo.
Matud pa ni MS Motocross big boss Lou Ornopia nga kapin sa 100 ka riders lukop nasud ang moapil sa kulbahinam nga
aksiyon nga gipaluyohan sa Yamaha Motor Philippines pinaagi sa ilang Sales and Marketing Director Kaoru Ogura.
“Our upcoming event is going to be bigger and grander with the support of Yamaha coming our way. We're looking forward to a
very exciting and more enjoyable race," sumala pa ni Ornopia, kinsa giila nga “Godfather of Cebu Motocross.”
Ang mga banggiitang riders nga gilaumang mopakita sa ilang katakus mao sila si Jon-jon Adlawan, John Flores, Dongkey
Sanchez, Jubenile Abellar, Windsor Famorca sa Guimaras ug Scott Remy sa Dumaguete ug uban pa.
Moapil sab sa aksiyon ang mga riders gikan sa Sel-J Racing Team sa Manila ug sa laing dapit sa Visayas ug Mindanao.
Sama sa naandan, ang mga kategoriya sa usa ka adlaw nga lumba naglakip sa mini 60cc ug 85cc, beginners, local enduro, open
enduro, executive A, B ug C, novice, intermediate, expert ug pro open.
Labaw pa niana, si Ornopia miingon nga ang Yamaha molusad og duha ka special categories nga ipahibalo unya.
Gawas sa Yamaha, ang kalihukan gipaluyohan sab sa CST Motorcycle Tire, Mobil Oil, F&FO Motor Parts, RMO Motor Parts,
JCO Motor Parts, New MS Apartelle, Prospeed, Motomaze, Ljun Motorparts, N Style Motor Parts ug Speed-up Motor Parts. (BANAT NEWS)