CEBU, Philippines – Adunay 21 ka barangay ang mosalmot sa Mayor Teresa P. Alegado Cup 2014 Fiesta Basketball League nga buksan karong Domingo didto sa Consolacion, Cebu.
Ang mga barangay nga mosalmot ubos sa Inter-barangay category A mao ang Cansaga, Poblacion Oriental, Poblacion Occidental, Jugan, Pulpogan, Tayud, Lamac, Danlag, Pitogo, Nangka, Tugbungan, Casili ug ang Cabangahan.
Buwagon sila ngadto sa duha ka brackets diin ang mga koponan moduwa’g double round robin format sa elimination. Ang top four moabante sa crossover semifinals diin ang modaog magsangka alang sa “best-of-three” final series.
Sa Inter-barangay category B, ang mopakita’g aksiyon mao ang Lanipga, Panas, Polog, Sacsac, Garing, Tilhaong, Panoypoy ug Tolo-tolo. Mosubay sab sila og double round robin format atol sa classification stage.
Lain pang mga kategoriya sa usa ka bulan nga torneyo mao ang SK division nga pangulohan sa defending champion Danlag. Bahinon kini ngadto sa upat ka brackets. Ang top two moabante sa quarterfinal round. Sundan sa crossover semis ug dayon “best-of-three” finals.
Ang mga duwa nga usa sa mga highlights sa tinuig nga kapistahan sa ilang mahal nga patron San Narciso pagahimuon sa basketball gyms sa Cansaga, Jugan ug Tayud. Ang kalihukan gipaluyohan ni Mayor Teresa P. Alegado, Vice Mayor Rey Damole ug sa mga sakop sa Sangguniang Bayan. Si councilor Nilo Ferraren maoy magsilbeng sports committee chairman, uban nilang Boy Tibon ug Liga ng Barangay President Marilou P. Casul.
Ang torneyo pagadumalaon ni sports commissioner Paul Alelu Q. Flores, kanhi varsity sa Far Eastern University (FEU). (BANAT NEWS)