CEBU, Philippines – Ang batan-ong player sa University of the Visayas Green Lancers nga si Leonard Santillan maoy kampiyon sa Slam Dunk Contest alang sa mga lokal players human siya makakuha'g perfect 10 nga 50 puntos gikan sa mga hurado kagahapon atol sa gipahigayon nga Cebu Schools Athletic Foundation, Inc. (CESAFI) North vs. South All-Star Games didto sa Cebu Coliseum.
Nagtabla sa 50 puntos silang Santillan ug Victor Rabat sa University of San Carlos aron makapugos og playoff alang sa final dunk ug ang ikatulong miabante sa finals mao ang laing Warrior nga si Charles Pepito.
Laing perfect 10 ang nakuha ni Santillan sa final dunk aron pildehon ang iyang mga karibal gikan sa USC. Si Santillan, kinsa moduwa sab sa All-Star Game sa collegiate division, sakop sa Batang Gilas Under 18 nga bag-o lang miduwa didto sa Dubai.
Sa laing bahin, mas makalingaw ang contest tali sa mga foreign players ug walay mibarug sa gikakitang mga dunks ni Shooster Olago sa USC Warriors aron maoy modaug sa titulo sa foreign dunkers category.
Si Olago kinsa migamit og tulo ka props nga silang Barry Amin, teammate nga si Espoir Toyambi ug Adams Mohammed. Human sa iyang kusog nga lambos sa bola, tulo sa lima ka hurado ang mihimo'g standing ovation isip reaksiyon sa hansak ni Olago.
Ang second placer mao si Bendley Valdor sa Southwestern University Cobras samtang ang third placer mao si Jeff Aguara sa University of the Visayas Green Lancers.
Sa laing bahin, si Antonio Tomas Pardo sa SWU maoy midaog sa titulo sa 3-Point Shootout human iyang gipilde sa tiebreaker si Rabat, 6-5.
Miabante silang Pardo ug Rabat sa finals human sila magtabla sa 13 puntos ug si John Michael Abad sa UV Green Lancers mi-iskor og nuybe puntos.
Sa juniors All-Star Game, midaug ang South batok sa North sa iskor, 87-60 diin si Theo Joshua Flores maoy nahimong MVP human siya mobahug og 18 puntos. Ang iyang teammates nga silang John Carl Escalona ug Orlan Wamar kinsa miamot og 13 ug 12 puntos, matag usa, nalakip sab sa Mythical Five lakip silang Janjan Jaboneta ug Zachary Huang sa Sacred Heart School-Ateneo de Cebu Magis Eagles.
Bugtong si Nino Araw-araw lang ang player sa North nga mi-iskor og double figures sa iyang 15 puntos.
Ning pagsuwat sa alas 5:30 sa hapon, padayon pang nagduwa ang North vs. South All-Star sa collegiate division. (BANAT NEWS)