CEBU, Philippines - Napuhalan sa Talisay City swimmers ang defending champion University of San Carlos (USC) ug 17-time title-holder University of Cebu (UC) sa unang adlaw sa aksiyon sa 19th Milo Little Olympics Visayas Regional Finals kagahapon diha sa Cebu City Sports Center.
Ang Talisay City swimming team mikubkob og 12 ka bulawan sa elementary division kortesiya ni Psalm Deniel Aquino sa Asian College of Technology Talisay ug ni Raven Faith Alcoseba sa First Chinese Royal Academy.
Mikabkab og unom ka bulawan si Aquino sa elementary boys’ ug gibuak niya ang rekord sa 50m backstroke (33.91), 100m butterfly (1:11.02), 200m freestyle (2:25.46), 200m individual medley (2:37.58) 400m freestyle (5:09.20). Ang 50m breaststroke (38.69) ang wala niya masiak.
Gibuak sab ni Alcoseba ang mga rekord sa 100m butterfly (1:15.46), 200m freestyle (2:33.32) ug 400m freestyle (5:04.73). Mihakot sab siya og mga bulawan sa 50m breaststroke (40.07), 200m individual medley (2:41.10) ug 50m backstroke (34.72). (BANAT NEWS)