Pacquiao-Marquez 5 pahingusgan ni Arum

CEBU, Philippines -  Ang ikalimang sangka nilang Manny Pacquiao ug Juan Manuel Marquez maoy unang prayoridad ni Top Rank Inc. CEO Bob Arum.

Sa taho sa World Boxing News, giingon nga ang prayoridad ni Arum mao ang fifth fight nilang Pacquiao ug Marquez sa Nobiyembre didto sa Macau.

Nasayran, si Pacquiao bag-o lang mipirma og “extension contract” uban sa Top Rank Inc. nga mapupos sa 2016 diin ang Filipino ring icon moaway og labing menos duha ka higayon kada tuig.

Si Amir Khan, mipadayag sa iyang interes nga makigsangka ni Pacquiao. Ang British boxer nga si Khan, sparmate kaniadto ni Pacquiao.

May posibilidad sab nga mag-abot  sila si Saul ‘Canelo’ Alvarez ug Pacquiao, bisan pa ang Mehikanong boksidor didto mipalandong sa Golden Boy Promotions, ang karibal sa Top Rank Inc.

Apan ang gipahingusgan ni Arum mao ang Pacquiao-Marquez fifth fight.

Ang duha ka boksidor pulos mihaw-as og daog diin si Pacquiao mipilde ni Timothy Bradley sa ilang “rematch”   niadtong Abril ug si Marquez mipukan ni Mike Alvarado sa imaging bulan nga nakapadaku sa kahigayonan aron mahitabo ang maong sangka. (BANAT NEWS)

Show comments