CEBU, Philippines - Ablihan na karong adlawa ang registration alang sa tinuig nga Yaw-Yan ArDigma Martial Arts Federation Inc. summer clinic diha sa Yaw-Yan Headquarters sa 4th floor sa Coast Pacific Downtown Center sa dalan Sanciangko, ning siyudad.
Ang first batch sa maong summer clinic sugdan sa Abril 1.
Gawas sa Yaw-Yan ArDigma system, ang summer clinic mitanyag usab og arnis lessons, boxing fitness, Yaw-Yan self-defense ug Mixed Martial Arts (MMA).
Gikan sa pulong nga "Sayaw ng Kamatayan" (Dance of Death), ang Yaw-Yan naila isip usa sa mga orihinal nga Filipino martial arts nga gimugna ni Grand Master Napoleon 'Nap' A. Fernandez.
Ang maong matang sa martial arts unang gitudlo niadtong 1972 didto sa Sta. Cruz, Manila.
Ang Yaw-Yan ArDigma usa ka all out martial arts nga mogamit sa lawas isip hinagiban ug motudlo sa mga tinun-an og saktong paggamit sa sukmag, patid, siko, tuhod ug ground fighting isip self-defense.
Alang sa dugang mga impormasyon, mahimong motawag sa 0906-5120888 o bisita sa ilang official website: www.yaw-yanardigma.com. (BANAT PALARO)