CEBU, Philippines - Gitubag ni Barangay Ginebra rookie center Greg Slaughter ang mga tirada sa iyang mga kritiko human sa makapakurat niyang pag-atras sa Smart Gilas Pilipinas national team line-up alang sa 2014 FIBA World Cup didto sa Spain.
Si Slaughter kinsa uban ni San Miguel guard Marcio Lassiter giuwan sa mga pagsaway human wa damha nga mitalikod sila sa Gilas kinsa nanginahanglan sa ilang serbisyo.
Ang Cebuano center nagkanayon nga dili makiangayon ang grabeng pagsaway ngadto kanila tungod kay miserbisyo na sila sa national team kaniadto.“For all the bashers please remember Marcio and I have proudly served the national team for four years straight. I even did everything,†matud pa niya sa The Philippine Star.
Si Slaughter subling mipasabot nga dili ra siya gusto nga magubot ang line-up sa Gilas ug salig siya sa ubang mga nahibiling players nga mas angayan nga morepresentar sa nasud kay sa kaniya.
Ang 7-footer miingon usab nga andam siya moduwa sa Smart Gilas sa mga musunod nga katuigan ug dili siya angay nga sawayon sa pagmakuli niya pagduwa karong tuiga sa World Cup.
Ang veteran journalist nga si Ronnie Nathanielsz usa sa mga grabeng misaway sa gibuhat nila ni Slaughter ug Lassiter kinsa iyang gitawag nga wala'y kasing-kasing sa usa ka tinuod nga Pinoy.
“It seems that Lassiter and Slaughter don't have a FILIPINO HEART. Their excuses were BS.Suspicious that both are from SMC,†dugang pa ni Nathanielsz kinsa nagduda nga gimandoan ra sa San Miguel Corp. ang ilang mga players nga moatras sa national team.
Dali hinuon kining gihimakak sa San Miguel Corp. kinsa midepensa nga wala sila manghilabot sa desisyon sa ilang mga players ug mas gidasig pa hinuon nila ang ilang mga magduduwa nga moserbisyo sa national team. (BANAT NEWS)