CEBU, Philippines - Ang Hungarian national motocross champion nga si Decsi Balaz ang naghari sa "Man and Machine Supercross National Series" niadtong Domingo didto sa South Road Properties (SRP) grounds.
Naangkon ni Balaz ang pro-open title taliwala sa presensya sa mga top local riders sama ni Cebuano teen sensation Jon-Jon Adlawan, kinsa mipahiluna sa ikaduhang dapit. Mikapyot sa ikatulo mao ang laing Sugbuanon nga si Jubenile Abellar.
Wala sab hinuon magmahay si Adlawan gumikan kay iyang gidominar ang pro-lite open pinaagi sa pagpilde nilang Balaz ug Abellar nga miangkon sa ikaduha ug ikatulo nga dapit.
Si Christopher Jules Bandigan maoy naghari sa novice open production. Si John Flores mipuwesto sa ikaduha, gisundan ni Jougee Basco.
Giharian sab ni JP Cuesta ang open enduro, samtang si Esrael Larido sa underbone division.
Lain pang mga mananaog sa tagsa-tagsa ka dibisyon naglakip nila ni Ayen Ledesma (veterans A ug B), Resty dela Calzada (beginners open), RK Cuesta (women’s division), Philip Leonardo (mini division), Bill Pepito (peewee 65cc) ug Shaun Peralta (peewee 50cc).
Ang maong lumba gipasiugdahan sa Man and Machine Racing Promotions uban sa suporta sa Cebu City Sports Commission, Kopiko 3-in-1 Coffee, Rusi Motors, Jela Construction, Sel-J Motorsports ug Nature's Spring Drinking Water.