CEBU, Philippines - Sa laraw nga makatabang sa kaliboan ka mga biktima sa bagyo didto sa Bogo City, ang Cornerstone Group mopahigayon og "Run to Rebuild Bogo" karong Enero 26 diha sa Parkmall.
Ang lumba nga gilangkuban sa 3K, 7K ug 14K categories, usa ka fund-raising event diin ang mga beneficiary mao ang mga typhoon Yolanda survivor didto sa Bogo.
Ang matigum nga kwarta gikan sa registration itabang alang sa pagtukod og kabalayan alang sa mga taga-Bogo ug lakip na usab niini ang paghatag og livelihood programs.
"Bogo really needs help after the damage brought by typhoon Yolanda to the city last year," matud pa ni Steve Maniquis sa Cornerstone Group atol sa press conference kagahapon didto sa Rajah Park Hotel.
"The proceeds will be used in buying construction materials for the Bogo people and also giving them ways to earn money."
"I am thankful that many people are trying to give help to Bogo. After the calamity we want to show that we are moving forward," segun pa ni Bogo City Mayor Celestino Martinez.
Ang mga organizers mobutang og donation booth sa Parkmall diin modawat sab sila og donasyon.
Gawas sa running event, si Maniquis miingon nga mopahigayon usab sila og triathlon race.
Mga ganting salapi ug gift certificates ang nagpaabot sa top performers sa 14K ug 7K class, samtang ang 3K giisip lang nga usa ka fun run. Ang tanang finishers sa 14K ug 7K makadawat usab og specially-designed finishers medal.
Ang registration fee nagkantidad og P500 sa 14K, P400 sa 7K ug P300 sa 3K libre na niini ang singlet, snacks ug raffle stub alang sa raffle draw nga himuon human sa lumba. Mahimong magparehistro didto sa Parkmall.