CEBU, Philippines - Moduwa na pagbalik ang sinaligang sentro sa Petron Blaze Boosters nga si Junemar Fajardo batok sa GlobalPort Batang Pier karong adlawa sa pagpadayon sa PBA Philippine Cup didto sa Smart Araneta Coliseum.
Ang 6-foot-9 ug kanhi No. 1 pick nga si Fajardo wala na makaduwa sud sa pipila ka semana human makaangkon og knee injury sa miaging buwan
Ang Petron nga pareho karon og standing sa Rain or Shine Elasto Painters sa ilang 8-3 win-loss records, tinguha nga magsolo sa ikaduhang dapit sunod sa No. 1 seed Barangay Ginebra San Miguel.
Ang Petron-GlobalPort showdown sugdan sa alas-8 sa gabii human sa lahugay tali sa Alaska Aces ug Meralco Bolts nga sugdan sa alas-5:45 sa hapon.
Gutom nga Batang Pier ang atubangon sa Blaze Boosters ilabi na nga nagtinguha kining mobangon gikan sa upat ka sunod-sunod nilang kapildihan.
Sa ilang bahin, ang Meralco maglaum gihapon sa impresibong performance sa beteranong si Danny Ildefonso.
Si Ildefonso malampuson sa iyang debut game uban sa Meralco batok sa Air21 Express diin miani siya og 16 puntos niadtong Sabado. (BANAT PALARO)