CEBU, Philippines - Quezon City – Misaad si Mexican world champion Sammy 'Guty' Gutierrez (33-9, 23KOs) nga iyang pahamtangan og sakit nga kapildihan si WBO light flyweight champion Donnie 'Ahas' Nietes (31-1, 17KOs) sa dihang magsangka sila sa main event sa "Pinoy Pride XXIII: Filipinos Kontra Latinos" fight card karong Sabado sa gabii didto sa Smart Araneta Coliseum.
Si Gutierrez, ang kanhi WBA minimumweight champion, sayod nga dili sayon mailog ang bakus ni Nietes ilabi na nga sa Pilipinas himuon ang away, apan ang 27-anyos misalig sa iyang abilidad ug nangahas paglangkat sa bakus.
"I tell this to him (Nietes), this is not a tune-up fight. I am here to win and get that belt to Mexico," matud pa ni Gutierrez atol sa final press conference kagahapon didto sa Gloria Maris Banquet Hall sa Gateway Mall.
Naglaraw si Nietes nga mobuak sa rekord ni anhing Gabriel 'Flash' Elorde nga nahimong world champion sud sa pito ka tuig.
"Nangandam gyud ko og maayo. Inspirado ko human daog nila ni (Nonito) Donaire ug (Manny) Pacquiao ug turno na nako nga mohatag og dungog sa atong nasud," matud pa ni Nietes
Sa supporting main event sa ALA Promotions ug ABS-CBN Sports, laing ALA Boxing gym world champion nga si Merlito 'Tiger' Sabillo (23-0, 12KOs) manalipod usab sa iyang WBO minimumweight belt batok ni Nicaraguan challenger nga Carlos 'Chocorroncito' Buitrago (27-0, 16KOs).
Mobalik sab og saka sa ring si Milan 'El Metodico' Melindo (29-1, 12KOs) nga tinguhang mobangon sa iyang karera isip world title contender batok ni Mexican Jose Alfredo 'Torito' Rodriguez (29-2, 18KOs).
Sa kulbahinam nga undercards, duha ka mga ALA stars nga sila si Jason 'El Niño' Pagara (31-2, 19KOs) ug AJ 'Bazooka' Banal (29-2, 12KOs) makigharong nila ni Vladimir Baez (19-1, 17KOs) sa Dominican Republic ug Lucian Gonzales (23-3, 14KOs) sa Puerto Rico. (BANAT PALARO)