CEBU, Philippines - Bisan pa og wa ang ilang franchise scorer nga si Mark Caguioa, gisakmit gihapon sa Barangay Ginebra San Miguel ang ilang ikaupat nga sunod-sunod nga daog pinaagi sa pag-ihaw sa Barako Bull Energy Boosters, 96-89, kagabii didto sa Smart Araneta Coliseum.
Sa maong kadaugan, ang Ginebra misaka karon sa ikapitong dapit sa standing sa ilang 5-5 win-loss record.
Wala makaduwa si Caguioa human kini makahiagum og MCL injury, apan giagak sa import nga si Vernon Macklin ug point-guard LA Tenorio ang Ginebra batok sa nagsalimuang nga Barako Bull (3-7).
Sayung gikontrolar sa Ginebra ang duwa ug gitukod nila ang tres puntos nga labaw sa first-half, 46-43.
Giinat pa sa Ginebra ang labaw pag-abot sa third period human nila giposte ang syete puntos nga labaw, 69-62, sa 1:53 sa maong kuwarter tungod sa paningkamot ni Macklin.
Si Macklin mirehistro sa iyang tournament-best 32 puntos ug 21 ka rebounds, apan mas misidlak sa Ginebra mao si Tenorio kinsa maoy top scorer sa mga local sa iyang 27 puntos lakip na ang mga krusyal nga three-point shots.
Nangulo sa Barako Bull mao ang ilang import nga si Evan Brock sa iyang 20 puntos og 11 ka rebounds, samtang si Allain Maliksi miiskor og 20 puntos.