CEBU, Philippines - Pormal nga gilusad ang 18th Gullas Tennis Cup age group tennis tournament didto sa Foreign Lounge sa
University of the Visayas.
Kapin sa 200 ka mga batan-ong tennis players gikan sa nagkadaiyang dapit sa Visayas ug Mindanao ang
mipadayag sa ilang pagsalmot sa maong torneyo nga gikatakda sa Abril 11-15 didto sa Laray, Consolacion, Cebu.
Ang pormal nga paglusad gipangulohan ni UV Executive Vice President ug event founder Jose 'Dodong' R.
Gullas uban nilang UV Vice President for External Affairs Atty. Joseph 'Dodong' Baduel, Swedish coach Tommy
Frederiksen, Sportswriters Association of Cebu (SAC) president ug event organizer John Z. Pages ug tournament director
Fritz Tabura.
Gibalik karon ang kompetisyon sa 21-under aron pagdani ug paghatag kahigayonan sa mga collegiate players
pagpakita sa ilang abilidad.
Ang Gullas Cup tennis adunay lima ka age group category -- ang 10 years under (unisex), 12 years under, 14
years under, 16 years under ug 18 years under.
Ang tanang kampiyon gikan sa 10 years ngadto sa 18 years makadawat og tropeyo ug gift certificates ug
makabaton sab og 150 puntos gikan sa Philippine Lawn Tennis Association (PHILTA) diin sanctioned ang Gullas Cup, usa
sa lima ka labing dugay nga torneyo sa tennis dinhi sa Pilipinas.
Adunay registration fee nga P300 libre na ang souvenir t-shirt, welcome dinner ug ubang balayranan nga may
kalabotan ning lima ka adlaw nga kompetisyon.
Matud pa sa tigpasiugda nga si Jose 'Dodong' Gullas, kinsa mahiligon sab sa tennis nga ilang gihimo ang
torneyo sukad pa niadtong 1995 aron pag-develop og mga batan-ong tennis players dinhi sa Sugbu nga nagpangedaron
gikan sa 10 ngadto sa 18 anyos. (BANAT NEWS)