CEBU, Philippines - Nakahiagum sa labing una nilang pilde ang Smart Gilas Pilipinas human sila pildeha sa host team Al Ahli Club Dubai, 82-97, niadtong miaging gabii sa 24th Dubai International Basketball Tournament didto sa Al Ahli gym sa United Arab Emirates.
Ang Gilas midaog sa una nilang duwa niadtong miaging Biyernes batok sa Lebanon, 79-77, apan wala sila kaporma batok sa Dubai team nga migamit og tulo ka American import.
Sila si Leemire Goldwire ug LeRoy Hurd miiskor og 24 ug 21 puntos matag usa, samtang ang kanhi NBA player nga si Cheikh Samb mipuntos og 18 alang sa Dubai.
Sayung milabaw ang Dubai, 26-18, sa first period og gikontrolar nila kini hangtud nga miabot sa 19 puntos ang ilang labaw 51-32, paingun sa second half.
Nangulo sa Smart Gilas ang kanhi collegiate stand-out nga si Garvo Lanete nga adunay 12 puntos, samtang si KG Canaleta ug Marcus Douthit mihipos og 10 ug nuybe puntos matag usa.
Ang Pilipinas sunod makigharung sa Sporting Amarex sa Jordan karong gabii alang sa katapusan nilang duwa sa Group B. (gikan sa InterAKTV.com)