Sotto nagningning para sa 36ers
MANILA, Philippines — Mas maganda ang inilaro ni Kai Sotto sa kanyang third game sa Adelaide 36ers.
Subalit hindi pa rin ito sapat para tulungan ang kanyang tropa matapos lasapin ng Adelaide ang 89-100 kabiguan sa kamay ng Illawarra sa 2021-22 Australia National Basketball League na ginanap sa WIN Entertainment Centre.
Nakalikom ang 7-foot-3 Pinoy cager ng 12 puntos tampok ang perpektong 8-of-8 sa freethrow line habang nagdagdag pa ito ng limang rebounds sa kanyang 13 minutong paglalaro.
Nanguna para sa 36ers si Sunday Dech na naglista ng 20 markers kabilang ang anim na three-pointers habang naglista naman si Todd Withers ng 15 points.
Nag-ambag pa si Daniel Johnson ng 10 points at walong rebounds at si Cameron Bairstow ng walong puntos at 10 boards para sa Adelaide.
Nahulog ang Adelaide sa 3-5 marka.
Umangat naman ang Illawarra sa 5-3 baraha kung saan nagningning si Harry Froling na may 27 puntos kabilang ang walong triples.
Nagsumite pa si Tyler Harvey ng 19 markers habang naglista naman si Sam Froling ng 18 points para sa kanilang tropa.
Sunod na makakasagupa ng Adelaide ang Tasmania sa Biyernes.
- Latest
