Sabta kini pag-ayo

Kon undangon sa kadagkoan sa Cebu City ang pagbutang og mga parking slots daplin sa mga karsada nga kanunay’ng maghuot ang mga sakyanan, siguradong mapamenos ang problema sa trapiko.

Napanid-an man gud nako nga diha sa mga karsada nga maghuot ang mga sakyanan paglusot, tungod sa both sides parking, makasinati gyud og problema sa trapiko.

Ang kadagkoan sa Cebu City Transportation Office (CCTO) wa sab magtan-aw niining maong problema kon unsaon pagsulbad. Ang mga opisyal sab sa siyudad nagpabaya ra sab.

Balikon nako pagpasabot nga naamong ra gyud ang siyudad kay ang gitan-aw nila mao nga ang City Hall makadawat man og kita nga P8 million gikan sa bahin sa koleksyon sa parking fees.

Mao kini ang bugti sa hilabihan ka problema sa trapiko dinhi sa siyudad. Kamong mga opisyal sa Cebu City, apil ang mga konsehal, hinuktuki kuno pag-ayo.

Pananglitan ang Manalili Street gikan sa eskina D. Jakosalem paingon na sa eskina Legaspi, ug dili kana paparkingan og mga sakyanan, pwerteng luaga sa maong karsada.

Karon gud, ang masi’g ka daplin sa karsada gibutangan man og parking slots alang sa mga four-wheel vehicles sa usa ka bahin sa karsada, ug mga motorsiklo sab didto sa pikas.

Kon moingon mo nga asa man paparkinga ang mga sakyanan, ang mga mangompra kon dili paparkingan ang karsada. Dili na kana problema sa siyudad, problema na kana sa tagdumala sa department store.

Aron daghan ang mangompra sa ilang tindahan, aw maghimo sila og kaugalingon nila nga parking area ug mahimong kolektahan nila og bayad kadtong mamarking.

Kini maoy gihimo sa ubang mga negosyante. Ang siyudad sa Sugbo dunay ordinansa nga ang mga dagkong tindahan kinahanglang dunay parking area alang sa ilang mga customer, apan wa kini ipatuman diha sa ubay-ubay nga mga tindahan.

Para nako, gamay ra kaayo ang P8 million nga kita sa siyudad sa usa ka tuig gikan sa bahin sa Tokagawa Global Corporation nga maoy gipiyalan sa City Hall pagpangolekta sa parking fees, kon ibugti nimo sa grabeng problema nga namugna tungod sa parking slots nga naa sa karsada.

Unta, milagrohan ang pangisip sa atong mga opisyal sa Cebu City, gikan sa mayor, bise mayor ug mga konsehal, nga dili gyud maayo nga bisan asa na lang nga karsada butangan og parking area.

Ang lain nakong awhag sa mga opisyal sa siyudad mao nga kon tangtangon ang mga parking slots sa pipila ka karsada nga kanunay’ng makasinati og grabeng traffic, karong sunod tuig, ang siyudad na pinaagi sa CCTO maoy mangolekta sa parking fees.

Dakong salawayon ug kadudahan ang tinguha sa mga opisyal nga ang pribadong kompaniya gitugotan nila nga makanegosyo gamit ang karsada nga iya sa kagamhanan. Matud sa Supreme Court, “Roads are beyond the commerce of man.”

Show comments