Usa ka adlaw niana nihatag og pakigpulong ang atong talahurong pangulo nga si BBM. Iyang gisugyot nga ning taliabot nga El Niño kinahanglang mangandam kita ginamit ang mga balde diha sa pagpundo og tubig nga atong kinahanglanon.
Tingali may punto siya apan ang pangutana unsa pud kaha ang gihimo sa gobiyerno agi’g pagpangandam niini?
Dili lang kini usa ka personal nga pagpangandam hinunoa usa kini ka nasudnong responsibilidad nga angayang pangulohan ug pasiugdahan sa usa ka may pokus nga liderato.
Ang usa ka liderato nga dunay pagbati sa iyang mga ginsakpan. Ang usa ka liderato nga wala lamang magsud-ong sa iyang kaugalingong seguridad kondili alang sa kaayohan sa kinabag-an.
Apan ang pangutana mao: Nahuptan na ba kini sa atong pangagamhanan?
Ug sa mas halawom nga pangutana: Makabarog ba kita sa atong kaugalingong mga tiil nga nahimo naman kitang dependent kaayo sa gobiyerno nga nigamit sa mga serbisyo aron pagpatunhay sa ilang kaugalingong panginahanglan ug tinguha.
Dios na lay mag-igo nato sanglit ang unang mabasol ang mga bumuboto gyud mismo nga nilumid sa ilang kaugalingong katungod sa pagpili og mga mangulo ngadto sa mga dili angayan ug walay ayo.
Sa laktod daghanan kanato ang mabasol tungod kay daghanan kanato walay igong baruganan. Bisan pa og unsaon nato og rally ug pasiatab mahimong ulahi na kaayo ang tanan gawas lamang kun himoon natong mausab ang paagi nga gisud-ong nato ang kalibotan ug mamahimong makabig ang atong mga hunahuna ug kasingkasing ngadto sa kasingkasing ug hunahuna sa Dios atong Amahan.