EDITORYAL — Eskandalo

Usa ka dakong eskandalo kaning nadiskubrehang laptop nga naay mga hulagway ug video sa child pornography usa sa ka panimalay sa Cebu nga gipuy-an og usa ka langyaw.

Dili kini ordinaryong langyaw lang, ugangang lalaki kini ni Prince Harry sa Britain. Anak sa maong langyaw si Meghan Markle, ang asawa sa prinsipe.

Hangtud karon, nagpadayun pa ang imbestigasyon sa kapolisan bahin kang Thomas Markle, ang amahan ni Meghan nga dugay nga panahong nagpuyo dinhi sa Cebu sa wala pa kini nilarga sa Amerika sayo ning tuiga.

Ang maong langyaw nihimakak sa alegasyon nga may kalabotan siya sa maong mga kalapasan. Pero mipasalig si Interior Minister Jonvic Remulla nga kasohan si Thomas kun dunay ebidensya.

Ang maong eskandalo nabalita sa usa ka tabloid didto sa Britain, apan gihimakak kini sa maong langyaw.

Apan gipistahan kini karon og maayo didto, tungod kay ugangan kini sa ilang prinsipe ug kauwawan kini sa iyahang asawa.

Ang mismong igsuon ni Meghan nga si Thomas Markle Jr. maoy nakadiskubre sa maong laptop ug mga unod niini.

Dili palang dugay, walo ka mga suspek sa Online Sexual Exploitation of Children (OSEC) dinhi sa Cebu ang nakombikto sa korte nga gikonsiderar sa mga otoridad nga kalamposan sa kampanya pagpahunong sa pagpangabusar sa mga kabataan.

Sa nangaging mga katuigan, usa ang Cebu sa gikatahong dunay daghang kaso sa OSEC.

Usa sa mga gitudlong hinungdan mao ang kakabus mao nga dunay mga ginikanan nga gigamit ang ila mismong mga anak pagbaligya sa ilang mga anak sa mga online child predators.

Kaning kalisod dili ni sayun masolusyonan sa mga otoridad, apan bugtong proteksyon sa mga kabataan para dili mabiktima sa OSEC, kana ra gyung konsensiya ug tinud-anay nga pagmahal sa mga ginikanan sa ilang mga anak.