Kun ang spokesperson sa prosecution panel sa impeachment trial batok ni Vice President Sara Duterte ang pasulti-on, ang expose ni kanhi senador Antonio Trillanes IV nga dunay dul-an P500 million nga kwarta gikan sa gobyerno sa China ang misulod sa mga kompaniya nga konektado sa bise presidente maoy kamatuoran sa dugay na’ng pagtahap nga dunay gibayran nga mga gamhanang politiko ang China aron pagprotehir sa ilang interest dinhi sa Pilipinas.
Segun ni kanhi Surigao del Norte congressman Robert Ace Barbers ang pundo gikan sa China posibling gamiton sa destabilization batok sa pamunoan ni Presidente Bongbong Marcos o ba kaha simpleng sohol sa ilang pagpakahilom ug paglaban sa China taliwa sa papating niini didto sa West Philippine Sea.
Sa iyang press conference niadtong Oktubre 2, gibutyag ni Trillanes ang giingong dul-an sa tunga sa bilyon ka pisos nga pundo nga nadawat sa mga kompaniya nga konektado kang Duterte ug sa iyang bana nga si Atty. Manases Carpio.
Segun ni Trillanes, dunay P319 million gikan sa Chinese government ug sa China-based corporations nga misulod sa panudlanan sa Cale88Foods Corp., nga giingong gipanag-iya nilang Duterte ug sa iyang bana.
Gawas niini dunay laing P150 million ang giingong misulod sa Tapang at Malasakit Foundation sa bise presidente.
Sa kinatibuk-an mokabat og P456 million ang kantidad nga giingong gikan sa China.
Tinuod man o dili ang pangangkon ni Trillanes, usa ka butang ang klaro ug dili matuis---ang kahilom sa bise presidente sa nagpadayong panghasi sa China sa mga sundawo ug mga sakop sa coast guard sa Pilipinas nga nagbantay sa atong teritoryo didto sa West Philippine Sea.
Ang kanihit sa mga pamahayag sa bise presidente mahitungod sa nagpadayong tensiyon didto sa WPS ug iyang masabot nga kaikog pagbadlong sa China masabot nga tua siya dapig niini inay nga sa Pilipinas nga iyang gialagaran.
Ang iyang kapakyas pagpalanog sa tingog aron kundinahon ang pagpanamastamas sa China sa atong kadagatan ug ang paghasi niini sa mga Pilipinong mananagat masaypan nga pagbudhi sa iyang kaugalingong nasud ug sa mga Pilipino kang kansang interest angayan untang maoy iyang prioridad.
Mahimong dili magkasabot si Duterte ug Marcos sa politika, apan kun ang interest na sa nasud ug sa katawhan ang gihulga angayan silang maghiusa.