Makangil-ad ba sa view sa Capitol ang bus station sa BRT?

Seguro ka? Tingalig makadugang hinuon kini sa iyang pagka-imposing ug pagkatahom. Alang kanako, walay usa kanato ang supak sa pag-preserbar sa atong heritage, ug paglubong ngadto sa kalimot sa mga butang sa nga iya sa atong kagahapon.

Ang labing ulahi nga pamahayag ni Mayor Mike Rama, bahin niini, nag-confirm sa pagka-kinahanglanon ug paka-kamahinungdanon sa heritage, kay mao kini ang mo-connect kanato sa atong kagahapon ug karon, ug sa atong ugma.

Ang internet nagkanayon: “Cultural heritage is a vital part of a society’s existence.” Dakung kabahin sa atong existence, sa gusto kitag sa dili. Gi-recognize kini ni Mayor Mike, sa iyang pag-ingon:

“Atong klarohon para masabtan pag-ayo sa mga silingan nato nga mga politiko. Kitang taga-Cebu City, naghatag ug dakong pagpakabana pag-preserbar ang mga heritage site sa Sugbo. Dakong garbo na nato ug dili na nato pasagdan aron ang sumusunod nga henerasyon naay ipadayon.”

So, klaro, dili kinahanglan nga awayan. Sa atong giingon sa una natong mga lindog, mao lamang ang dialogue, paghusay sa usa ka gamay nga misunderstanding between cultural preservation and economic development.

“Uyon ta nga atong protektahan ang Kapitolyo, walay lalis diha,” dugang ni Mayor Mike. So, walay lalis. Unsa may gilalisan karon?  Maghuwat na lang ta sa tubag sa Office of the President.

In the meantime, adunay miingon nga ang BRT anti-poor kuno, nga sila rang mga dato ang maka-afford sa plitehan unya, ug wala usab kini mosalir o wala magsilbe sa ubang nasud nga misagop niini.

Unsa may ilang gibasihan niini?  Ania ang pasalig sa Mayor: “Atong gipaningkamotan nga ang tanan matagaan ug luag, komportable, ug luwas nga transportasyon pinaagi sa CBRT. Atong gihatagan sa  mga pagatagad ang mga concerns sa katawhan, uban sa pa-awhag ug pagdasig nga magtinabangay kitang tanan alang sa kalamboan sa Sugbo.”

* * *

Ang latest survey nga gihimo sa Pulse Asia nagpakita nga 88 percent sa mga Pilipino supak sa gipasiugdahan karon sa House of Representatives nga Cha-cha, kon paghimo og kausaban sa atong Konstitusyon.

Sa ato pa, dakung majority sa katawhan ang supak niining maong laraw ug intiative sa atong gitawag nga mga Kongresista kon kining mga magbabalaud sa Lower House. 

Unsay nahitabo? Ang maong survey gi-question sa duha ka House leaders nga bias kono ang mga pangutana, among others.

Ania, sumala sa napatik sa The Philippine Star: “Two House leaders yesterday questioned the latest Pulse Asia survey results which showed that 88 percent of Filipinos are opposed to the amendment of economic provisions in the 1987 Constitution.

“In separate statements, Deputy Speaker and Quezon Rep. David Suarez and Majority Leader Manuel Jose Dalipe said that “biased and leading” questions have been utilized and this could have influenced the results.”

Wala sila motuo sa resulta sa survey, kay naturally, nasupak man sa ilang gusto. Ug nasayod na kita unsay ilang gusto. Nga mouyon kita sa ilang mga tinguha, nga kon nsa man ang ilang mga hidden agenda, kinahanglan modason usab kita.

Atong hangyo. Respitahe ninyo ang kabubot-on sa lungsod. Kon unsa man ang inyong mga laraw ug tinguha, ayaw mi i-bypass, and don’t ignore us.