Tungod lang gyud sa sampot

Dili gyud angayan nga magdala sa kasuko ug labaw na sa hambog kay seguro nga mao gyud kini ang magtukmod sa tawo ngadto sa kaaulotan sama sa nahitabo sa sikat nga Bisdak rapper nga si Range 999 kinsa natanggong karon sa bilanggoan human nakapusil og usa ka langyaw niadtong Domingo sa buntag sa gawas sa usa ka imanan nga nahimutang sa dakbayan sa Sugbo.

Nakuhaan og CCTV footage ang panghitabo diin tumong unta sa singer nga banggaan sa iyang sakyanan ang langyaw apan nakahunong kini ug sa ikaduhang higayon didto na iyang napusilan ang langyaw nga naigo sa iyang abaga ug paa. Hinuon nadala kini sa tambalanan ug anaa na sa stable nga kahimtang.

Samtang nisibat unta si Range 999 apan nadakpan ra usab dayon atol sa follow-up operation sa kapolisan ug gikatakdang pasakaan og kasong frustrated murder ug illegal possession of firearms ngadto sa piskalya sanglit desidido usab nga mopadayon sa kaso ang biktima.

Katarungan ni Range 999 nga iyang napusilan ang foreigner tungod kay gibinastosan niini ang mga kauban nilang babaye pinaagi sa pagkuot sa lubot sa amiga sa singer hinungdan nga nainit siya ug niulbo gyud ang iyang kasuko nga nakahimo siya og krimen.

Kong hunahunaon gipalit ra sa singer ang kasamok nga dili gyud unta siya ang direktang apektado. Apan tungod sa iyang pagpakabana aw siya gyud ang nabutang sa ataw-ataw karon. Asa naman ang mga babaye nga iyang gilabanan? Maayo unta kon mobarog kini dapig niya pinaagi sa pagsaksi sa kaso ug labaw sa tanan pagpasaka usab og kaso or counter-charge batok sa langyaw sa iyang pagpanguot og sampot.

Dili lang kasuko ang gipatigbabaw kon dili ang dakong garbo sagol hambog niadtong higayona nga posible usab nga nasagolan sa espirito sa ilimnong makahubog maong nakahimo sa krimen.

Luoy intawon ang pamilya sa singer kay siya ra man diay ang gisaligan karon matud sa iyang amahan nga naamong gyud sa naghingapi niyang kalagot nga gibati sa iyang anak. Anugon nga sikat na unta ang bisdak rapper apan sa nahitabo kaniya posibleng mahagba ang tanan.

Apan kong tan-awon nato ang maayong side sa gihimo sa singer, ingon niini siya ka loyal sa mga tawo nga suod sa iyang kinabuhi. Hinaut ingon usab niini ang himoon sa mga tawo nga iyang gidapigan ug dili siya biyaan sa dakong hagit nga iyang giatubang karon.