Kahiusahan sa Sugbo, ang mga mabulahan ang mga Sugboanon

Gibuksan kagahapong adlawa ang kasaulogan sa ika 454th Founding Anniversary sa lalawigan sa Sugbo diin saulogon gyud kini sa petsa 6 ning buwan sa Agusto. Usa ka tabo o display sa mga produkto gikan sa kalungsoran ug mga dakbayan sa lalawigan ang makita ug mapalit sa mga tawo nga mohapit sa capitol compound.

Barato ug presko nga mga abot sa atong mga kaigsoonan nga mag-uuma ang anaa didto ug mamahimo ra mohangyo. Apan kong adunay saktong budget ayaw nalang hangyoa kay layo baya pud kaayo ang ilang gigikanan ug nituyo lang og tugbong sa dakbayan aron matilawan ang ilang mga hinaguan.

Samtang ang pagbukas sa founding anniversary mao usab ang kahigayonan sa pagkatapok sa mga opisyal sa lalawigan sa Sugbo apil na ang mga ahensiya sa kagamhanan ang nipakita sa Capitol Social Hall  nga nagsimbolo sa kahiusahan nila.

Nindot kaayo tan-awon ang ilang presensiya ug labaw na nga nindot paminawon ang ilang mga message of support sa usa'g usa kay sa ingon niini mas molambo ang serbisyo ngadto sa mga Sugboanon kay wala namay mobabag sa mga programa nga gitumong alang sa katawhan.

Si Gobernador Gwen Garcia gibansagan nga Iron Lady sa lalawigan tungod sa lig-on ug dili matuis niya nga baruganan sa mga isyu nga naglambigit sa kaayohan sa Sugboanon, isog kon isog bahala na og usa siya ka probinsyana mosyapol gyud batok sa mga opisyal gikan sa kaulohan kon siya ug ang iyang mga konstituwente ang mabutang sa alanganin.

Sa tinuod lang maldita ang gobernador nga magkinto kadtong mga tawo nga magtinapolan ilabi na sa mga nag-alagad sa kagamhanan maong pangulbaan gyud ang mga Capitol employees apil na ang mga department heads kay mora'g mag-defend gyud sila sa thesis kon ang gubernadora na ang ilang ikaatubang.

Apan ang kinaiya maoy nahatag og disiplina sa mga kawani sa ingon magtinarong kini sa pagserbisyo sa mga tawo, dili sila mauwaw nga ang gubernador kanunay magtrabaho unya sila magpahahay lang.

Tungod sa panaghiusa sa mga lider sa Sugbo, namugna ang One Cebu Island kay nagkatakdo naman ang mga gipatuman nga palisiya ilabi na niadtong panahon sa pandemic nga wala gyud matarog ang Sugbo gikan sa gipatuman nga power trip sa pipila ka mga national officials.

 Unta magpadayon ang kahiusahan sa Sugbo ug dili kini matarog ugaling adunay paglihok unya sa pamolitika. Kong nahimo kini karon mamahimo usab kining ipadayon.