Bahakhak sa hilom
Niining nagpadayon nga panagsungi tali nilang Mayor Michael Rama ug MCWD chairman Joey Daluz klaro kinsay nakapabor,
dili lang diha sa bantawan sa opinyon sa publiko apan lakip na sa suporta sa mga kawani ug opisyal sa water district.
Pruweba niini ang deklarasyon sa bag-ong mga opisyal sa union sa mga kawani sa MCWD nga nagpadayag sa ilang pagpaluyo kang Daluz.
Ang mga miyembro sab sa MCWD board wa gyud mokihol bisan pa sa demand letter gikan sa City Hall nga hulipan na si Daluz
kang Miguelito Pato.
Si Pato mismo wa mangusog nga mopuli ni Daluz bisan kun gitudlo siya ni Rama nga maoy hulip ni Daluz.
Hangtud niadtong Biyernes way bisan usa sa lima ka sakop sa MCWD board ang nangahas pagpasiugda og reorganisasyon sa
board. Kini timaan nga nagpabilin ang ilang suporta ngadto ni Daluz.
Dako ni nga sagpa alang ni Rama. Di ba uwaw alang sa usa ka mayor nga way namati ug misunod sa iyang tingog?
Ug tingali mas misamot ang iyang pagpanlipaghong dihang gipahibawo ni Daluz ug sa mga opisyal sa MCWD ang mga
nagpadayong proyekto niini aron matubag ang atong kakuwangan sa supply sa tubig.
Matud ni Daluz nga gawas sa bag-o lang nga nakuha nilang supply gikan sa Lusaran Bulk Water Project diin naghatag ni og
dugang 15 mil metro kubiko nga supply sa tubig matag-adlaw, mosugod na sab karong Oktubre pag-supply og 10 mil metro kubiko
nga "desalinated water" ang Pilipinas Water Resources Inc.
Ang PWRI gipaabot nga mosupply og hangtud 25 mil metro kubiko matag-adlaw. Sumala pa ni Daluz mao ni tubag sa posible nga
epekto sa huwaw sa atong mga tinubdan sa tubig sanglit tubig gikan sa dagat ang ilang gamiton pinaagi sa proseso nga gitawag og desalination.
Ug tungod kay tubig man sa dagat dili maapektuhan ang supply bisan pa kun dunay El Niño.
Kini nagpadayon taliwa sa giingon ni Rama nga way gibuhat ang MCWD pagpangandam sa posible nga epekto sa El Niño.
Sa gipahibawo sa kadagkuan sa MCWD mura og naigo sa kinumo ang apapangig ni Rama nga wa siya masayod og diin gikan.
Ug tingali sa hilom labihan ka dako sa bahakhak ni Daluz nga puno sa mga pagbugal-bugal ngadto sa mayor.
- Latest