Human sa kapin sa buwan niya nga pagpakahilom atubangan sa pagbisto ni Senador Risa Hontiveros sa smuggling sa asukar nga gikatahong gipasiugdahan sa Malakanyang, nitingog sa Administrador David John Thaddeus Alba sa Sugar Regulatory Administration (SRA) aron pagklaro nga ang nagkagrabe niyang sakit ang tinuod nga hinungdan sa iyang resignasyon.
Ang pagtingog ni Alba, imbes makapapas, mao na hinuon ang nakapasamot sa mga pagduda nga di ang iya rang high blood pressure ang nakapugos ni Alba sa pagbiya sa puwesto nga iyang gihuptan sa niaging pito pa lang ka buwan.
* * *
May kasayuran nga nahipos si Hontiveros nga mahimong mohatag og ideya sa publiko sa unsay wa isulti ni Alba: Wa pa niya pirmahi ang clearance sa 5,000 metric tons sa imported sugar gikan sa Thailand nga nidunggo sa pantalan sa Batangas sa wa pa ipublikar sa SRA ang Sugar Order No. 6.
Gipahalipayan ni Hontiveros ang kaisog ni Alba pagbalibad sa giingong pagpamugos sa Department of Agriculture (DA). Maoy hinungdan nga dul-an sa duha ka buwan nang natanggong ang importasyon sa All Asian Countertrade nga niabot niadtong Pebrero 9.
* * *
Kasagaran nato wa kaila ni Alba sa wa pa itudlo ni Presidente Ferdinand Marcos Jr. puli ni kanhi Administrador Hermenegildo Serafica. Bugtong gipahibawo sa Malakanyang nga siyay kanhi general manager sa Asociacion de Agricultores de La Carlota y Pontevedra ug sa La Carlota Mill District Multi-Purpose Cooperative sa Western Visayas.
Kon tinuod ang nadunggan ni Hontiveros gikan sa iyang mga tinubdan sa industriya sa asukar supak si Alba sa paggamit sa SRA sa pagpalusot sa mga transaksiyon sa paboritong importers sa Malakanyang.
* * *
Mga kaila ni Alba sa Bacolod City niingon nga gisumiter ang iyang resignasyon pila ka adlaw human gibutyag ni Hontiveros nga ang SRA gisugo ni Agriculture Senior Undersecretary Domingo Panganiban sa pag-release sa shipment sa All Asian bisan sa mga pasangil sa smuggling.
Dihang wa aksiyoni sa Malakanyang ang iyang resignasyon sud sa pila ka semana, gipahibawo ni Alba ang iyang pagbiya sa puwesto atol sa tigom sa SRA Board niadtong Lunes. Human sa pila ka adlaw, napugos ang Malakanyang sa pag-angkon nga ni-resign si Alba ug pag-insistir nga iyang sakit maoy hinungdan.
* * *