Maayong option alang ni Teves

Gipangayo na sa biyuda ni anhing governor Roel Degamo gikan sa liderato sa Kongreso nga palagputon isip sakop sa ubos balay balaoranan ang ilang suspendidong kongresista sa tirsero distrito sa Negros Oriental nga si Arnulfo Teves, Jr.

Si Pamplona Mayor Janice Degamo miawhag ni House Speaker Martin Romualdez nga hukasan sa iyang pagkakongresista si Teves tungod sa matud pa daghang mga nahimong kalapasan.

Sa 61 ka pahina nga suwat ngadto ni Romualdez, gisaysay sa byuda ni Degamo ang giingong kalambigitan ni Teves sa mga kutay sa kaso sa patay didto sa ilang lalawigan ingon man sa illegal nga sugal.

Nakasabot ko sa gibati ni Mayor Degamo. Dili lalim sa usa ka asawa nga mangita og hustisya sa linoog nga pagpatay sa iyang bana.

Normal ang kayugot nga gibati sa byuda ngadto ni Teves sanglit siya maoy gitumbok nga mastermind sa pagpatay sa gobernador.

Apan angayang balansehon og maayo sa liderato sa Kongreso ang mga lakang nga ilang buhaton.

Dili maayong mopatigbabaw ang panag-alyansa sa politika sa paghimo og desisyon sa kaso ni Teves tungod kay posibling makapasamot ni sa kagubot didto sa lalawigan sa Negros Oriental.

Angayang ikonsiderar sa liderato sa Kongreso nga si Teves pinili sa katawhan ug ang mga pasangil batok niya moagi pa og taas nga proseso sa hukmanan.

Hangtud nga dili pa siya makonbikto sa mga krimen nga gipasangil batok niya giisip pa gihapon siya nga inosente.

Apan di sab angay nga makampanti si Teves niini tungod kay samtang di mahimong palagputon siya diha-diha tungod lang sa mga krimin nga gipasangil batok niya, ang iyang di pagsunod sa lagda sa kongreso mahimong magamit aron siya mapalagpot sa hingpit.

Pananglit ang wa niya pagsunod sa mando nga moreport na pagbalik sa trabaho. Ug ang wa niya pagpauli dinhi sa nasud bisan paso na ang iyang travel authority.

Di mahimong padayon siyang motago taliwa sa mga seryosong pasangil batok niya.

Kun tinuod siyang inosente, ang angayan niyang buhaton mao ang pagpauli ug atubangon ang mga pasangil.

Kun nabalaka siya sa iyang siguridad bisan matud sa kapolisan wa gyuy hulga, ni pasalig na si Presidente Bongbong Marcos nga way mahitabo niya.

Busa wa nay rason alang ni Teves nga di mopauli. Husto ang presidente nga ang labing maayong option ni Teves karon mao ang pagpauli ug pag-atubang sa mga pasangil samtang wala pa moabot ang sitwasyon nga kinahanglang gamiton sa kagamhanan ang tibuok pwersa niini.