Ang nahitabo sa patupat Mass hysteria ug eksorsismo

Wala sa akong plano nga molakaw niadtong mga panahona (March 14, 2023). Naa ra ko sa kwarto aron manglimpiyo. Tungod sa akong ka busy mao nga wala na gyud ko kalimpiyo sa akong kwarto. Sa kalit lang dunay nanawag sa akong cellphone. Si Fr. Romrom ug may nadawat usab akong message sa messenger gikan kang Fr. Raymund. Silang duha anaa karon sa Barili nadestino. Ang hinungdan dunay Mass Hysteria nga nahitabo sa Patupat National High School. Gidala ang mga kapin kun kulang mga 13 ka mga tinun-an. Kasagaran kanila nagpunay og siyagit ingon man singgit. Tuod man daghang mga tawo ang anaa na sa simbahan mismo sa Santa Ana. Sayud ko nga ang kadaghanan kanila nanguryoso lamang. Imbis makatabang nakapsamot naman hinuon sa kahimtang.

Ang pisikal nga Nahitabo

1. Sakit ang tiyan, maglisod og ginhawa. Punay og singgit

Unsay akong gibuhat?

1. Akong gi identify ang sinugdanan sa  maong hysteria. Sa ato pa, akong gipalahi ug gipalayo ang sinugdanan nga batan-on. Ako siyang gipabutang sa sakristiya ug gipabantayan.

2. Gitagsa tagsa nako og duol ang mga estudyante nga nahitaboan. Akong gipahatagan og igong hangin nga sa ato pa, ako silang gipabuhian aron makaginhawa og tarong. Gi-estorya ug gipakompisal ug gi-pray over.

3. Giuwahi nako og duol ang nag-una didto sa sakristiya. Ug human sa pag-ampo akong gimandoan nga mopahuway una sila.

4.Giadto nako ang tunghaan ug akong gibendisyonan. Hinuon mobalik pa ko didto aron himoon ang pagpasabot sa mga magtutudlo.

Pagpasabot kun unsa ang mass hysteria

Matud pa sa Dictionary of Psychology: Hysteria is emotional outbursts suggestibility and conversions symptoms which once considered a disorder such as conversion disorder, dissociative disorder, historinic personality disorder ug uban pa. ang nahitabo sa Patupat National High School, nahitabo usab sa laing mga tunghaan ug dili lang sa mga nagkadaiyang mga tunghaan kondili hasta na usab diha sa atong mga kasaysayan. Sa karaang panahon nahitabo ang Dance Mania. Ang lycantropy diin ang mga hingtungdan nagtuo nga sila mga lobo sulod sa lawas sa tawo ang naghimo og kawras sa ilang kaugalingong panit. Ang Dance Mania nga nakapahimo sa tawo nga mosayaw hangtud mamatay. Didto sa Ilocos dunay mga 28 ka mga tinun-an nagdungan og laslas sa ilang kaugalingong mga pulso. Maayo gani kay nabantayan dayon sila. Kini ug uban pang mga hitabo ang dili angayan nga ibalewala. Kinahanglang hatagan sila og igong pagtagad.

Unsa kaha ang hinungdan?

Kahadlok tungod kay lagi dunay anino nga nakita segun sa nakasaksi niini. (hetero suggestion)

Stress tungod ba kaha kay dugay matulog labina kay gikan pa sila sa camping ug ang mga batan-on karong mga panahona tutok kaayo sa gadgets. Wala pud ta masayud nga niadtong naghimo sila og camping tungod sa kakuryoso mamahimong nagpasiugda sila og ghost hunting og uban pa. Sa akong pagpangutana kanila majority kanila hilig usab motan-aw og mga horror movies.

Sugyot

1.Mas maayo ibalik ang physical exercises sa mga tunghaan ingon man manual work aron magawsan og singot ang kabataan. Ang pagpasingot makatabang og dako aron magawas og positive hormones gikan sa lawas sa tawo.

2. Likayan gyud unta ang congestion sa mga lawak saringan. Ang nahitabo sa Patupat tawag usab sa lokal nga pangagamhanan nga ayohon ang gubaon nga mga rooms sa mga kabataan aron dili sila maghuot. Stressful kun buot hunahunaon kun maghuot ug lisud ang pag absorb sa mga lessons.

3. Ang mga ginikanan mohimo og follow up sa ilang mga anak. Ang gadget maoy nahimong surrogate sa mga kabataan nga nagkinahanglan gyud unta og pagtagad sa ginikanan.

4. Ang pag-ampo ingon man ang pagpabalik sa sense of piety sa kadaghanan. Ang family rosary, pilgrimages ingon nga family bonding.

5. Himsog nga pagpuyo labina gyud ang paglikay sa mga stressors sa kinabuhi.

6. Labaw sa tanan pag-ampo sa makadaghan aron ang Dios sa kanunay manalangin.