EDITORYAL - Dugoong estratehiya vs drugas di mosalir-UNHCR

Mismo na ang United Nations High Commissioner for Human Rights ang nag-ingon, nga kining bayolenteng pamaagi ug pagpanglutos nga estratehiya pakigbatok sa illegal nga drugas dili epektibo ug nakapasamot na hinuon sa problema nga maoy gigamit nga pamaagi sa nagkalainlaing mga nasud, lakip na niini ang Pilipinas.

Matud pa ni UN High Commissioner for Human Rights Volker Turk kinahanglang dili punitive kondili transformative ang tumong sa kampanya batok illegal nga drugas.

May punto si Turk, bisan gani ang Amerika nga adunahan, moderno sa tanang aspeto sa pakigbatok sa mga krimen ug sa illegal nga drugas hangtud karon wala gyud makapuo niini tungod kay nakatutok lang sab sila sa kampanya pagdakop sa mga nalambigit niini.

Bisan sa ubang mga nasud wala sab mosalir ang pagpabug-at sa silot, pagpapatay sa mga notadong druglords ug uban pa sama sa nahitabo sa nasud sa Mexico, inay mobahar, mas midaghan na hinuon ang illegal drug players ug bisan as ana.

Dinhi sa Pilipinas, bisan tuod sa giingong kapin tres mil nga mga drug suspects nga napatay sa anti-illegal drugs operations sa kapolisan (nga mas daghan pa kun ang mga human rights advocate ang pasultihon) sa milabay nga administrasyon, wala gihapon kini mahunong.

Gani, kun kaniadto gramo-gramo ray makuha sa mga operasyon kontra illegal nga drugas, karon, kinilo na ug milyones na ang kantidad.

Labaw sa tanan, halos tanang nadakpan mga bag-ohay pang nisulod sa maong illegal nga negosyo  ug silang tanan miingon nga ang ilang mga agalon o nagsugo kanila, naa karon sa nagkalain-laing prisohan.

Nagpasabot lang nga wala gyud mahunong ug mas midaghan naman hinuon ang nalambigit niini ug dinagko pa ang transaksyon, sa samang paagi, ang ilang mga agalon atoa nagpahayahay sa mga prisohan nga pinakaon ug gwardiyado sa gobiyerno. Kinsa may alkanse niini?

Panahon na tingaling paminawon sa gobiyerno ang mga sugyot nga usbon ang estratehiya sa kampanya batok illegal nga drugas, estratehiyang makapaundang sa mga nalambigit nga dili na mopadayon o biyaan na kining maong bisyo.