Bisan si kanhi presidente Rodrigo Duterte nagtuo gyud nga ang pagpatay ni Negros Oriental Governor Roel Degamo binuhatan sa iyang mga kontra sa politika.
Ang Special Investigating Task Group nga nag-imbestigar sa pagpatay Degamo ug sa laing walo ka laing mga sibilyan, miingon nga nailhan na nila ang mastermind sa krimen.
Misamot nga makapaikag kaayo ang kalamboan sa imbestigasyon kay ang mga imbestigador may nakuha nga recorded video call sa mga suspetsado ug sa gituohang mastermind.
Wa pa gyud hinoon nila ilha ang giingong mastermind, apan si Negros Oriental 3rd District Congressman Arnolfo Teves nag-una-una na pagpanghimakak og bisan unsang kalambigitan sa pagpatay ni Degamo.
Si Kongresista Tevez igsuon ni Pryde Henry Teves, nga gideklarar nga mananaog pagka gobernador human sa eleksyon apan napalagpot.
Napalagpot si Henry Teves sa pwesto kay ang botos nga nakuha ni Degamo gidugangan man sa botos nga nakuha niadtong nuisance candidate nga nagdala usab sa ngalang “Ruel Degamo.”
Kon tinuod man nga si Kongresista Teves ang gipasabot sa mga imbestigador nga maoy mastermind sa pagpatay ni Degamo, unya dunay recorded video call nga nakuha ang kapolisan, dako gyud kaayo’g problema ni Teves.
Wa nila ipasabot pero nagtoo ko nga ang recorded video call nakuha sa kapolisan gikan sa cellphone sa usa ka dinakpan nga suspetsado pagpatay ni Degamo.
Duna ra ba’y pipila sa mga dinakpang suspetsado nga mipadayag na og kaandam nga sila mag-state witness, nagpasabot nga motug-an sila og kinsa ang nagsugo nga patyon si Degamo.
Matud pa ra ba nga ang pipila sa armas nga nakuha gikan sa mga dinakpan, mitali sa mga bala ug kapsola nga nakaigo sa mga biktima didto sa balay ni Degamo.
Apan ang lig-on gyud nga ebidensya mao ang testimoniya sa mga pipila ka dinakpan nga matud pa miabag na sa imbestigasyon nga gihimo National Bureau of Investigation (NBI).
Gani, ang duha sa mga dinakpang suspetsado, posible nga ipailawom sila sa Witness Protection and Benefits Program sa kagamhanan aron mapanalipdan sila samtang magpadayon ang paghusay sa kaso.
Matud ni Justice Secretary Crispin Remulla nga gitan-aw karon sa mga imbestigador nga dili lang usa ang mastermind sa pagpatay kang Degamo.
Sus, multiple murder ra ba ni, nagpasabot nga wa gyuy piyansa ug ang mapasakaan og kaso, makaestar gyud og dugay sa bilanggoan kay dili man madali ang paghusay niining kasoha.
Klarohon nato nga si Kongresista Teves didto sa United States atol sa pagkahitabo nga gipatay si Degamo, apan kon siya man ang mastermind, dili man problema ang komunikasyon aron makakontak siya dinhi sa nasud. Sundon nato kanunay ang kalamboan niini nga kaso.