EDITORYAL - Regulasyon sa fun runs

Lain na sab runner ang nakabsan sa kinabuhi sa fun run nga bag-ohay lang nahuman diha sa South Road Properties subay sa CCLEX niadtong adlaw nga Domingo.

Ning tungora, ang nakalas usa ka polis nga wala damhang atakihon sa kasingkasing. Ang maong polis matud pa sa ilang opisyal gradwado sa scout ranger training school, sa laktod, taas kini og resistensiya ug stamina.

Apan lahi ang pagdagan sa marathon o fun run itandi sa training sa polis o sundalo. Usa pa basin dugay na kaayo kadto nga training sa scout ranger ug kaniadto piskay pa gyud kaayo kini og lawas dili na parehas karon.

Sa pirme ng moapil sa mga ingon niini nga kompetisyon  posibleng usa sa rason nga masipyat sila pagpamati sa mga senyales nga gidiktar sa ilang lawas ug mauwahi na ang tanan.

Pagkatinuod, ang uban sa mga partisipante wala mag-apas nga makauna o maapil sa top runners, kondili, basta makalahutay lang og tiwas sa lumba, bahala og sa sila maoy kinauwahian basta nakalampos lang.

Ang kadaghanan aning mangapil sa mga fun runs  kadtong dunay gustong pamatud-an sa kaugalingon, ang tuyo bisan makalampos lang sa finish line, mura na sab sila og maoy nikampeyon.

Ang uban basta lang makadawat og singlet bahala og di makatiwas, kay duna naman silay ikapanghambog sa social media.

Kaning mga ingon niini kahalinon nga mga kalihokan maoy kinaham sa mga dagkong korporasyon o kompanyang gustong makatigom og pundo para sa ilang mga umaabot nga kalihokan.

Basta mobayad lang sa entrance fee ug mopirma sa ‘waiver’ otomatiko ng mamahimong partisipante ang si bisan kinsa. Wala nay medical screening.

Apan subo lang dunay peligro sa pagapil niini ilabi na niadtong dili sigurado sa kahimtang sa ilang panglawas, nga duna diay nagumido nga sakit nga mahimo nilang ikamatay kun masobrahan kahago ang lawas.

Dili lang kini kausa pa nahitabo dinhi sa Sugbu, kondili makadaghan na nga dunay namatay atol sa paugnat sa kusog, kasagaran, sa mga fun runs sama niadtong nahitabo sa miaging Domingo. Gani ang mga nakalas mga propesyonal na nga runners.

Maayo tingaling dunay regulasyong ipasunod ngadto sa organizers. Dili kutob lang sa pagdawat og partisipanteng makabayad ug dili magsalig  anang waiver.  Tabla ra man na og nanghunaw daan kun maunsa ang runner.