Red tag

Naalarma karon ang Population Commission tungod sa pagsaka sa gidaghanon sa mga nag-edad og 10 ngadto sa 14 nga nabuntis. Kini human mius-os ang gidaghanon sa mga nag-edad og 15-19 nga nabuntis. Tungod niini, giawhag ni Lisa Gace Bersales, Executive Director sa Population Commission, ang gobiyerno  sa paghimo og tukmang lakang aron maminusan ang gidaghanon sa mga anaa sa maong edad nga mabuntis.

Sa iyang pag atubang sa House Committee on Youth and Sports Development nga nagpahigayon og pagdungog, basi sa datus sa Civil Regstry sa Statistics System sa Philippines Statistics Authority (PSA) iyang giingon nga moabot sa 2,113 ka mga bagong bata ang natala nga natawo sa mga inahan nga nag edad og 10 ngadto sa 14 anyos niadtong tuig 2020.

Si Bersales nagkanayon nga sigun sa Field Health Service Information System sa Department of Health, iyang nabantayan nga adunay 2,534 ka mga inahan nga nag edad og 10 ngadto sa 14 nga nanganak niadtong tuig 2020 apan kining maong gidaghanon miubos ngadto sa 2,299 niadtong tuig 2021.

Si Jelie Barceta sa Department of Social Welfare and Development Social Technology Bureau miingon nga niadtong tuig 2019 miabot sa 2,411 ka mga bata ang natawo sa ilang inahan nga nag edad og 10 ngadto sa 14 ug kon sumadahon ang tanan apil ang nag edad og 19 moabot na sa 133,000 ang mga inahan nga anaa sa maong edad niadtong tuig 2021.

Si Dr. Diego Danila, usa ka espesyalista sa Department of Health, mitumbok sa kakuwang sa edukasyon mahitungod sa sayong pagbuntis sa mga bata ang nagpaluyong rason sa pagbuntis sa mga nag edad og 10 ngadto sa 14.   

Apan ang tubag sa mga magbabalaud sa Ubos Balay Balauranan mao kining mosunod: Age and Developmet appropriate reproductive health and sexual education, access to contraceptives by adolescents ug comprehensive nga legislation o balaud.

Sa pito ka mga balaudnon karon nga nakaung-ong sa Ubos Balay Balauranan gusto sa mga magbabalaud nga makapalit o makagamit og pills o contraceptives ang mga bata nga wala na kinahanglana ang pagtugot sa ilang mga ginikanan. Sakto ba ni nga sulbad? Ambot laaang.