EDITORYAL - Saludo para sa matinabangon

Naila ang mga Pilipino sa pagka-matinabangon sukad pa kaniadto, usa kinsa sa mga maayong pamatasan nga gitudlo diha sa panimalay ug sa mga eskuylahan.

Apan subo lang nga kini nga kinaiya hinay-hinay ng nawagtang ilabi na sa mga kabataan karon.

Gitudlo gyud sa mga eskuylahan ang maayong pamatasan apil na niini ang pagkamatinabangon sa uban nga nagkinahanglan.    Ang nakaapan, sa modernong panahon ug teknolohiya karon nawad-an og oportunidad ang mga kabataan nga gamiton ang tanang gitudlo kanila sa tunghaan mahitungod sa maayong pamatasan.

Bisan pa man niini, naa pa gihapoy mapili nga andam gihapong motabang, bisan sa talagsaon kaayong sitwasyon.  Mao kini ang gibuhat sa duha ka tinun-an sa kursong nursing sa University of Cebu College of Nursing nga sila si Angyl Fayth Ababat ug Kristianne Joice Noelle Ona nga wala magduhaduha pagtabang sa 58 anyos nga ginang nga giluba ang liog diha sa aseras sa Osmeña Blvd. sa miaging semana. Ang duha pareho pang nakauniporme sa nursing ug physical education sa ilang eskuylahan.

Samtang ang ubang mga tawo bisan nakakita nga nagkadugo na ang ginang gikan sa dakong samad sa liog wala moduol aron pagtabang, apan walay pagduhaduha nga mitabang ang duha ka tinun-an.

Matawag nga ‘first aid’ ang gihatag sa duha ngadto sa ginang. Ang first aid krusyal kaayo sa mga trauma ug medico legal patients.

Pinaagi sa hustong first aid malugwayan pa ang kinabuhi sa gitabang. Ang first aid mao ang taytayan nga magkonektar gikan sa scene ngadto sa mga professional nga mga tambalanan.

Haom kaayo og gikuhang kurso kining maong mga tinun-an, dili sila mahadlok. Walay nagsugo kanila ug dili sila obligadong motabang ilabi na nga dili pa sila mga lisensyadong mga nurse.

Apan ang ilang gipakita mao ang maayong pundasyon gikan sa ilang panimalay nga mao ang maayong pamatasan. Nga tabangan kadtong nagkinahanglan kutob sa mahimo.

Maayo kaayo ug makiangayon  kining nigawas nga balita nga ang ilang tunghaan mi-offer kanila og scholarship.  Mahal ang tuition sa maong kurso karon ug dako na kaayo kining tabang sa pamilya aning mga bataa, ilabi na mismo sa duha, aron makab-ot nila ang ilang pangandoy nga mamahimong nurse.