EDITORYAL - Modernisasyon sa agrikultura

Nakasinati ang Pilipinas og klase-klaseng krisis ug ang labing batakan niini mao ang pagkaon. Gikan sa bugas, asukar, mantika, harina, asin, mga utanon ug daghan pang uban duna gyuy mga panahong magnihit ang suplay, ug epekto niini ang pagsaka sa presyo.

Dakong bahin sa pagkaon nga mapalit sa kamerkadohan ug mga grocery stores sa nasud dili abot sa mga lokal nga maguuma. Dili kini gikan sa mga umahan sa kabukiran sa Pilipinas kondili imported gyud gikan sa gawas. Samtang tuod gikinahanglan sa Pilipinas mag-import og mga pagkaon ingon man mga sangkap niini, gikinahanglan gyud nga palambuon og maayo ang lokal nga agrikultura aron pangbalanse sa imported ug sa samang higayon makapalit bisan ang mga kabus nga Pilipino. Apan lahi sa ubang mga nasud, pananglitan sa Japan ug Taiwan, ang ilang agrikultura gitutokan og gisuportahan gyud sa ilang gobiyerno.

Didto, ang mga gagmay nga mag-uuma hasta ang mga namuhi og isda sa mga fish cages ug fishponds dinagko og kita gumikan kay maayo ilang produksyon tungod sa pagabag sa ilang gobiyerno. Suportado sila bisan dili tanan libre apan gisubsidiya sa gobiyerno ang uban nga nga galastohan aron dili mabug-atan ang ilang mga maguuma.

Gitudloan sila og mga teknikal nga kahibalo kun unsaon pagpalambo ilang tanaman, kun unsaon nga abunda ang bunga, labong ang mga dahon, tambok ang mga binuhing hayop o isda, kunsaon pagpasanay niini ug uban pang mga gikinahanglan aron lang gyud modako ang produksyon sa pagkaon ug masiguradong abunda og suplay sa pagkaon ang nasud. Dinhi sa Pilipinas, lisod kaayong pangitaon ang mga kawani sa Department of Agriculture aron kapangayoan og teknikal nga kaalam ug mga siyentipikong pamaagi o ideya aron unta makapadako sa produksyon sa mga maguuma.  Kun duna man, maayo lang og mobisita o mangumusta sa mga umahan ug tanaman kausa sa usa ka tuig. Ang uban niana naahat lang gyud sa pagduaw kay duna nay nahitabong problema sama sa peste, katalagman ug uban pa ug aron adunay ika-report. Wala gyuy motutok paglingkod sa mga maguuma pagtudlo ug paggiya kay kadaghanan anha ra magpundo sa ilang mga opisina. Kapuyan motungas sa bukid o molubog sa lapok sa mga humayan. Ang gikinahanglan sa agrikulturang sektor sa Pilipinas mao ang modernisasyon, butang nga wala hatagi og pagtagad sa gobiyerno para sa mga gagmay nga maguuma.