Katekesis No. 84

Walay isulti, walay hunahunaon, walay tinguhaon

Kini ang gitudlo ni San Juan dela Cruz ngadto sa mga tawo nga nakasinati og espirituhanong kauga ug kalibog. Unsay buot ipasabot niini?

1. Walay isulti: Gamhanan ang pulong. Mahimong makapadasig, mahimong makapaluya ug makapadaut sa mga tawo.

Kun wala kay mahinungdanon isulti mas maayo nga magpakahilum na lamang aron sa uban dili kita makapasakit.

2. Walay hunahunaon: Ang hunahuna nga puno sa mga kabalaka ug mga kalibog maoy makapahimo sa matag tawo nga ma stress ug makapaluya sa ilang hunahuna ug balatian.

3. Walay tinghuhaon: Wala kini magpasabot nga dili na lang gyud kita mangambisyon sa kinabuhi.

Ang buot ipasabot lamang niini mao man ang paghunahuna ug pangindahay sa mga butang nga sibo sa atong maabot.

Sa laing bahin, mamahimo unta kitang andam sa kanunay sa mga kausaban nga masugatan diha sa atong panaw.

Kun dili man gani mahatagan og katumanan ang atong mga gipangandoy ug kun abli kita ning maong posibilidad, nan dili kaayo kita masakitan.

Daghan man nato ang mahadlok tuod sa kahilom apan ang kahilom kinahanglanon aron kita mamahimong magmalinawon ug pinaagi sa kahilom makita nato ang atong kaugalingon.