Sa di pa mangugat silang Justice Secretary Jesus Crispin Remulla ug Solicitor General Menardo Guevarra sa paglalis sa pagbalik sa pormal nga imbestigasyon sa extrajudicial killins (EJKs) sa kampanya sa ilegal nga drugas ni kanhi Presidente Rodrigo Duterte, angayng sublion ang ilang math:
• 52 ra ka EJKs ang gi-imbestigar sa administrasyong Duterte ug 250 ra ka EJKs ang gisusi sa administrasyong Presidente Ferdinand Marcos Jr.;
• Wa ra sa kumingking sa 6,181 nga nangamatay nga giangkon sa kapolisan ug sa kapin sa 30,000 nga gipasangil sa human rights groups.
* * *
Ang 52 ka kaso nga gisubli ni Guevarra sa siya pa ang justice secretary ni Duterte 0.8% ra sa 6,181 ka kaso sa patay nga giangkon sa Philippine National Police (PNP) ug 0.1% ra sa kapin sa 30,000 ka kaso nga na-dokumento sa non-government organizations(NGOs).
Ang 250 ka kaso nga gibilin ni Guevarra para ni Remulla 4% ra sa ihap sa PNP ug 0.8% ra sa ihap sa NGOs. Wa pay klaro kon tarungon ba og subli sa National Bureau of Investigation (NBI).
* * *
Pipila sa mga kaso nga nasubli na ni Guevarra napamatud-an nga nakalapas sa batakan nga mga lagda sa operasyon sa PNP, sama sa pagtanom og drugas ug armas ug pamakak nga nisukol ang inosente nga mga biktima.
Mas makapaalarma ang mga implikasyon. Kay ang PNP ra ang nagpili sa mga kaso nga ilang gipasubli ni Guevarra ug sa NBI. Mas dako pa tingali ang bulilyaso sa mga kaso nga ilang gitagoan.
* * *
Salawayon nga bugalbugal ang pag-insistir ni Remulla nga di angay nga apurahon ang pagsubli sa mga kaso kay pito ka buwan pa lang ang administrasyong Marcos.
Sayon niyang gikalimtan gipakatug lang ang mga kaso sa termino ni Duterte ug gilihok na lang dihang nangimbestigar nang ICC.
Ang pasalig sa administrasyong Marcos pagpatigbabaw sa rule of law ug pagpahumot sa iyang liderato nga nisubay sa mga mithi sa katilingban sa mabuot nga mga nasud nitampisaw sa kanal sa ilang pagdumili pagsumiter sa gikinahanglan nga mga dokumento ug sa pagsurender ni Duterte ug sa iyang mga berdugo ngadto sa ICC.
* * *